Tin hopi expectativa pa yegada di Minister drs. Marisol Lopez-Tromp for di Hulanda. El a keda di yega awe pa e siman aki ainda sigui cu e di dos tanda di e reunion publico di Parlamento pa atende cu desconfiansa contra e mandatario. Pero, e reunion a bolter completamente contra e mesun fraccion di POR cu a pidi e reunion cu sosten di RED y MEP. Awo a resulta cu e Minister no a bin Aruba ainda y no tin fecha pa regresa ainda tampoco.
Como cu awe husticia, cu ayudo di Recherchesamenwerkings Team (RST) di Hulanda, a tene inval na cas di coordinador di ex Minister Otmar Oduber y despues a drenta Bestuurscollege, a bolter henter e panorama politico. Cu Hues Comisario y Fiscal Mayor drentando bacha compaña pa decenas di recherchenan arma den Cocolishi, ta muestra cu centro di gobernacion di nos pais ta bou investigacion. Husticia ta investigando Gabinete Wever-Croes pa corupcion cu tereno. Ta precisamente locual nan a acusa e Gobierno anterior di dje, awo nan mes ta envolvi. Y pio ainda, e minister actual di Infrastructura a confirma den parlamento cu ainda Otmar Oduber ta kere di ta na poder y ta purba corumpi e sistema. Ora Lopez a par’e, el a laga sa cu e ta bah’e tambe for di su puesto.
Na salida di Minister Lopez di Aruba despues di a atende un reunion maratonico den parlamento e dia prome, e mandatario no a descarta di lo por tin otro reunionnan na Den Haag ora e ta na Hulanda. Asina lagando espacio habri pa pensa cu e lo por splica Madre Patria di con corupcion ta tumando luga den gran forma, hasta awo cu Oduber a “sali” for di politica, pero e laga su hendenan strategicamente posiciona den departamentonan crucial. Cu si Lopez a haci esey nos no sa, pero a mira cu e caso Flamingo a cuminsa lora atrobe awo.
Nos a puntra esunnan yega na e Minister ki dia e ta bin y e contesta tabata “no sa ainda”. Parce cu e mandatario ta cabando cu asuntonan di famia pa su yiu muhe di 17 aña por establece y sigui studia na Hulanda. Pa colmo e siman aki mes tin Conseho di Minister di Reino, den cual lo bin claridad di con gobernacion lo sigui na Aruba.
Es mas, pa ora Marisol Lopez tey bek, lo mester regla su funcion. Sea e ta keda cu su ministerio of ta lag’e como “minister sin cartera”, locual ta algo masha inusual. Tambe lo haya contesta cu si POR ta entrega MEP nan minister y ta baha di dos pa un solo minister. Pasobra den parlamento a tende cu lo no otorga un otro minister na e partido. Enfin, e situacion ta bastante bruha y pa otro siman lo tin mas claridad, dependiendo si Ministerio Publico bishita mas cas e siman aki of cuminsa detene e sospechosonan.
