Minister Rudy Lampe ta lamenta cu Parlamentario Hendrik Tevreden no a haci su “huiswerk” miho, “pasobra e ora ey e lo no a bisa un mentira den Parlamento”. Di e forma aki Minister di Enseñansa Rudy Lampe a reacciona riba e expresion haci door di e Presidente di MEP y miembro di Parlamento Hendrik Tevreden durante e reunion riba integridad.
E Parlamentario a cuestiona cu Nora Leonora a haya un nombramento como director di UNESCO, ya cu e persona encarga a bay cu pensioen. El a cuestiona cu no tabatin un solicitud habri y a bisa cu basa riba esaki “RED no por papia di integridad”.
“Loke el a bisa ta un mentira. Nora Eleonora no tabata riba lista di partido RED durante e ultimo eleccion. Nora Eleonora no ta miembro di partido RED. El a trece informacionnan incorecto manera cu ta trata aki di hendenan di partido RED. Den pasado Nora Eleonora tabata miembro di RED, pero el a tuma distancia y separa di e partido basta aña caba.”
El a splica tambe cu na momento cu a nombre como hefe interino di DPS (Departamento di Scolnan Publico) e tabata pa un periodo defini. Awo e no ta directora mas pasobra su periodo a termina. “Mi ta lamenta cu sr. Tevreden ta trece informacionnan incorecto dilanti. Si bo ta un parlamentario, bo tin cu studia e materia bon, wak bo fuentenan y no tira algo den laira. Aworaki e ta keda para como mentiroso cu a trece algo incorecto dilanti.”
