Dialuna a tuma luga e desvelo di e logo nobo di Enseñansa pa Empleo y e renobacion pa haci e edificio di Enseñansa Pa Empleo uno moderno.
Enseñansa Pa Empleo ta hopi importante pa e industria di turismo di Aruba, cu hopi hende ta yega aki pa forma parti di diferente curso cu nan tin pa ofrece.
Minister Glenbert Croes, durante e reapertura a indica cu tabata 35 aña pasa cu a funda Enseñansa Pa Empleo na Aruba. Tabata temponan dificil pa nos isla,, unda cu Aruba a haci un reenfoke di su desaroyo. El a inverti tur su esfuerso, vision, direccion den turismo. Mester e prepara tur esunnan cu a perde trabou, pa duna nan ‘her-, om- y bijscholing’. Esey ta e meta pa cual a funda Enseñansa Pa Empleo.
E mandatario a recorda cu e instituto aki a inicia tempo cu Lago a cera su porta, den momentonan di hopi reto y a cuminsa cu e compromiso pa desaroya e sector hotelero grandemente y den esaki EP a hunga un rol importante. Y awo Aruba ta den otro momento desafiante y un biaha mas e instituto cu ta drenta un era nobo, lo bay hunga un rol importante atrobe.
E mandatario a gradici tur su coleganan pa e apoyo den e proyecto di modernisacion di EP. Incluso e miembronan di Parlamento cu a acudi, cu ta esunnan cu ta sostene maneho dirigi riba mehoracion, manera den e caso aki.
Mas aleu, e mandatario a bisa cu no ta coincidencia cu Enseñansa pa Empleo ta situa band’i Departamento di Progreso Laboral (DPL). Na Enseñansa pa Empleo e ciudadano ta ricibi e curso necesario pa e por subi mercado laboral y na DPL, nan ta intermedia pa bo por yega na un trabou.
E echo cu tin dos aña, hunto cu Utilities NV ta trahando riba educacion digital, cu ta preparando e trahadonan pa aki 20 aña. Na scol ya caba ta haciendo programanan di inteligencia digital bou di liderazgo di Bruce Harms y Tania Croes, cu apoyo di Utilities NV.
For di jong ta cuminsa siña e muchanan pa programa y haci proyecto riba computer. Ta preparando e muchanan di awo caba pa programa, haci diferente pa ora cu nan subi mercado laboral. Esaki ta esencial pa e educacion di futuro.
Esaki ta e manera pa sigura Aruba un tremendo futuro y Enseñansa Pa Empleo ta esencial.
E mandatario a bisa cu e ta contento ora di scucha cu e aña’ki EPE tabatin 1600 cursista, nada comparabel e forma tempo cu el a tuma e programa aki over. Awe tin un EPE renoba y modernisa, dunando hopi hende un expectativa cu oportunidad nobo.
El a recorda cu aña pasa tabatin 31 klas y den 2023 el a bira 64. Na 2022 tabatin 19 vak y den 2023 el a casi yega 30 curso. Tur esaki ta wordo haci cu 10 trahado cu ta guia henter e programa.
Aruba ta na un momento desafiante despues di pandemia, unda mester a re-entrena e forsa laboral, pa brinda oportunidad nobo na cada ciudadano. Pero tambe esnan cu ta busca perspectiva nobo. Den e desaroyo nobo Enseñansa Pa Empleo ta bay hunga un rol importante, cu cursonan tecnico den sector energetico.
