Tur di dos diaranson di luna, ta adapta prijs di combustibel na Aruba, sea e ta baha of e ta subi. Minister di Asuntonan Economico, Comunicacion y Desaroyo Sostenibel, mr. Geoffrey Wever ta anuncia cu prijs di combustibel ta baha mañan, entrante dia 8 di maart 2023. E prijsnan di diesel y kerosin ta baha basta, pero esun di gasolin ta baha un tiki so.
Gasolin lo baha cu 4,9 cen y ta bira 257,6 cen pa cada liter. Diesel ta bira 234,8 cen pa liter, despues di a baha cu 25,5 cen. Kerosin tambe a baha y su prijs nobo ta 222, 4 cen pa liter, cu ta nifica un reduccion di 47,7 cen. Tur prijs ta inclui BBO/BAZV/BAVP.
Mayoria di e placa di benta di combustibel ta bay pa gobierno. Den diferente forma gobierno ta genera hopi entrada for di e benta di combustibel. Gobierno ta genera miyones via Fuels Marketing & Supplies Aruba (FMSA) cu ta importa y rebende e producto, via accijns y tambe dos schakel di BBO, cu ta suma total 14% na BBO so!
