For di algun luna caba informacionan tabata circula cu Hilton Aruba lo bay construi un toren/edificio nobo riba su propiedad existente. Recientemente e informacion aki a keda confirma pa e propio hotel. Ta trata di un toren nobo cu un tiki mas cu 160 camber adicional. Ta trata di un inversion di riba 100 miyon dollar. E toren nobo lo ta situa ‘Ocean Front’. Esaki ta nifica cu e cambernan lo tin bista riba laman. Esaki lo bira e di 4 toren mirando cu ja caba tin e Aruba, Bonaire y Curacao Tower. E toren nobo lo ta situa dilanti di e Curacao Tower. Construccion lo cuminsa den luna di Mei 2023 y lo dura te cu 2025. Durante e construccion un parti di un di e piscinanan lo ta cera pa asina por acomoda un crane cu ta forma parti di e construccion. Adicional na e construccion di e toren nobo aki e hotel mes lo conoce diferente embeyecemento. Tur e restaurantnan lo conoce un cambio drastico den nan interior.
Riba rednan social e bishitantenan fiel di e hotel a reacciona den diferente forma. Algun ta jama e expansion y renobacion bon bini. Di otro banda tin otronan cu no ta haya e expansion necesario y of ta preocupa cu nan vacacion no lo ta manera cu nan a spera debi na e trabounan di construccion cu lo ta andando riba e propieda.
E hotel a informa cu durante por ehempel e simanan druk di Pasco y Fin di Aña no lo tin trabounan ta tuma lugar.
