Recientemente Minister di Husticia, mr. drs. Arthur Dowers, hunto cu Secretario di Estado Eric van der Burg, a haci un bishita di trabou na tereno di refineria di Aruba. Director di Refineria di Aruba (RDA), Robert Henriquez, a guia e delegacion durante un recorido extensivo y a brinda informacion detaya riba e estado actual di e instalacionnan, infrastructura existente y futuro di e tereno.
E bishita ta relaciona cu e proyecto “HART” (Herinrichting Aruba Raffinaderij Terrein), un iniciativa di Gobierno di Aruba cu ta enfoca riba ceramento definitivo, desmantelacion y desaroyo sostenibel di e antiguo refineria Lago na San Nicolas.
Durante e recorido, a dialoga riba e diferente posibilidadnan pa futuro di e tereno, teniendo cuenta cu e interes economico, ambiental y strategico di Aruba.
Minister Dowers a splica cu desde algun luna caba un grupo di trabao ta preparando un governance structure pa determina e miho manera di sigui cu e tereno y instalacionnan di refineria.
Actualmente tin diferente discusion den comunidad y Parlamento relaciona cu futuro di refineria. Na un banda tin e enfoke riba desmantelacion, mientras cu na otro banda ta evalua posibilidad nobo, teniendo cuenta cu e desaroyonan recien na Venezuela. Sinembargo, independientemente di e direccion cu eventualmente lo bay, desmantelacion di un parti considerabel di e instalacionnan existente ta necesario debi na nan condicion di deterioro.
Un otro aspecto importante ta e posibilidad pa haci uzo economico di cierto parti di e infrastructura existente, particularmente e tankinan na Zeewijk pa almacenamento di crudo. Pa esaki un proceso di aanbesteding ta canando, cu ta spera di haya mas claridad riba su resultado pa final di e luna aki.
E proceso pa determina futuro di refineria lo inclui participacion di diferente actor y instancia relevante, cu e meta di yega na un solucion responsabel y sostenibel.
Minister Dowers a enfatisa importancia di un proceso cuidadoso, transparente y structura, cu ta tene cuenta cu e oportunidadnan economico, e aspecto ambiental y e interes general di Aruba.
