E seleccion masculino di Aruba a participa den Concacaf Nations League. E seleccion di Aruba a sa di haci un bon trabou y a sali di dos di su grupo den Liga C. Cu e resultado aki, Aruba ainda ta den contidencia pa Copa Oro.
Randolf Lacle, presidente di Arubaanse Voetbal Bond (AVB), a expresa di ta contento cu nan presentacion. “Berdad, mi por bisa cu mi ta hopi contento. Nos tin cu tene na cuenta cu Antigua y Barbuda no ta un ekipo facil. Aruba tabatin un mal record contra nan. Nos a gana nan e prome biaha, pero lamentablemente den e di dos wega Aruba no por a logra victoria”, Lacle a declara.
Segun e presidente di AVB, e resultado general a duna Aruba e oportunidad pa sigui den e competencia. Ademas di e posibilidad pa lucha pa un luga den Copa Oro, Aruba a clasifica tambe pa semifinal di Copa League C di Nations League como e miho ekipo cu a termina na segundo luga.
Dos resultado positivo sigur. Lacle ta kere cu nos seleccion ta bin ta dunando algun bon resultado. Tambe e ta spera cu nan por sigui riba e mesun linea den e añanan cu ta bin.
Desaroyo di futbolistanan ta hunga un papel importante
Lacle a destaca tambe e importancia di e preparacion y formacion di e futbolistanan cu ta representa Aruba, tanto den e seleccion femenino como masculino. Segun dje, e trabou di TDS y e academia ta contribui na formacion di e hungadonan hoben y na nan desaroyo pa yega na un nivel mas halto.
E presidente di AVB a menciona cu mas futbolistanan di Aruba ta haya oportunidad pa muda pa Hulanda, unda nan por hunga na un nivel mas halto. E conexion entre e futbol di Aruba y e nivel competitivo na Hulanda, segun Lacle, ta bira cada biaha miho.
E ta di pensamento cu no ta importa unda nan bay hunga, pero ken cu ta bon pa representa Aruba, lo ta yama.
