E veld di bala na Lago Heights ta den decadencia. Netnan ta wordo horta. Luznan ta den un super mal estado. E situacion no ta bon. Minister Dangui Oduber a comenta cu a tuma nota di esaki y ta hopi lamentabel cu e cosnan aki ta wordo haci cu deporte.
Na final di dia ta e deportista, e mucha, e hoben bo ta perhudica. Ta buscando manera tambe con pa yuda eynan. Den e situacion aki no ta asina facil pa por haya financiamento pa tur e deseonan cu tin, pero tur caminda cu por yuda, den e caso aki na Lago Heights, ta busca manera pa reemplasa e net, mescos cu na Kudawecha.
Ta un reto cu hopi veld tin na Aruba, cu e net ta den super mal estado. E condicion fisico di e veldnan tambe ta den mal estado, pero ta busca manera pa contribui na un manera positivo na deporte. A percura tambe pa den Noord, e veld di SV United tambe a busca palo di luz y luz pa nan. Ta algo sumamente positivo cu nan por bay train anochi.
Na e momentonan aki e instalacionnan ta andando. A percura pa veld di Flatstone haya luz. Na Caravel tambe a percura pa haya palo di luz y luz. Asina ey ta trahando cu curason pa deporte, pa mehora deporte, pa mehora infrastructura. Si bo no tin un bon facilidad, dificilmente bo ta bay motiva e mucha pa participa na deporte. Esey ta e pensamento cu tin tras di e proyecto di artificial turf.
Na momento cu tin turf, bo tin bon iluminacion, bo tin bon backstop, bo tin net, bo tin bon tribuna, automaticamente e mucha ta yega veld pa practica deporte.
