Ministerio di Salubridad Publico ya pa varios siman caba ta haciendo preparacionnan necesario pa Aruba por ricibi e prome lote di vacunanan. For di aña pasa den reunionnan di “vier landen overleg” hunto cu Minister di Reino, Paul Blokhuis a establece tur e procesonan cu lo mester encamina prome cu Aruba por ricibi e vacuna. Minister Oduber a trece dilanti cu ya caba tin tres vacuna cu ta riba mercado, esta esun di Pfizer, Moderna y Astra Zeneca’s.
Minister Dangui Oduber a sigui bisa cu cada un di e vacunanan aki tin nan propio temperatura stipula cu nan mester warda nan aden. Pa e motibo ey Hulanda a pone como rekisito tambe un freezer special cu mester uza pa por warda nan. Aruba no tabata dispone di e freezernan aki y pesey mes a haci un peticion na Hulanda pa haya nan. Minister Oduber a laga sa cu tur cos ta canando segun e plan, dia 13 di januari e prome freezernan a yega Aruba.
Tin e vacuna di:
- Pfizer – cu mester warda na un temperatura di -80 graden Celsius
- Moderna – cu mester warda na un temperatura di -20 graden Celsius
- Astra Zeneca – cu mester warda na un temperatura regular di cooler
Y lo bin mas vacuna tambe riba mercado durante e aña aki. Minister Dangui Oduber a sigura si cu den e prome lote lo ricibi solamente e vacuna di Pfizer. Si tur cos sigui segun plan, dia 25-26 januari proximo representantenan di “Rijksinstituut voor Volksgezondheid en Milieu” (RIVM) lo ta na Aruba pa controla tur e preparacionnan cu Aruba a haci y ta haciendo pa ricibi e vacuna. Minister Oduber a trece dilanti cu e prome vacunanan lo por entrega na Aruba memey di februari 2021.
Minister Dangui Oduber ta convenci cu Aruba lo haya e lus berde di RIVM dia 25-26 di januari. Aruba a traha duro pa por cumpli cu tur e rekisitonan estableci pa Hulanda. Desde december ta trahando duro y pesey mes e mandatario ta sinti cu Aruba ta cla pa ricibi e lus berde pa por haya e vacuna.
Finalmente e mandatario ta haci un apelacion na pueblo di Aruba pa vacuna nan mes, proteha nan mes, pa asina Aruba por progresa. Ban yuda den e recuperacion di nos turismo y recuperacion di nos economia pa asina Aruba por bolbe bek na normalidad, asina Minister Oduber a expresa.
