La Linda N.V. a bati bancarota dia 23 di december 2020, despues cu a sali afo cu no tabatin mas opcion pa e por sobrebibi y surpasa e momentonan di reto financiero. Abogado mr. Geert Rep, apunta dor di hues como “bewindvoerder” a bira e “curator” pa inventarisa tur propiedad y articulonan di La Linda pa por bende y asina paga e debenan cu a keda atras. Pero, awor ta resulta cu tin un disputa legal riba e autoridad y competencia di e curator, den cual e doño di e edificio ta prohibie di cambia slot di e portanan.
Despues cu hues a dicta bancarota den e caso di e creditornan contra La Linda N.V., mesora e curator a cuminsa su trabou. Ta for di e prome siman di januari 2021 el a drenta e edificio cu flashlight pa por a verifica kico tur tin den e edificio, kico tur e por bende ainda pa yega na fondo pa, entre otro, paga trahadonan, belasting y otro debenan cu e compania tin. Como cu e edificio no tin coriente, ta haci trabou di e curator mas dificil ainda.
Ta resulta sinembargo cu e edificio ta pertenece na un compania diferente mientras cu e “inboedel” ta di La Linda N.V. Abogado lo a splica e curator cu e no por cambia slot di e porta. E curator a pidi e doño, Haima Hochman pa e dun’e e yabi di e edificio pero e ultimo a nenga, pasobra segun Hochman, na piso 1 tin articulonan di La Linda pero na piso 2, 3 y 4 ta propiedad personal di dje cu no ta pertenece na e “inboedel” y como tal e curator no por bay cu ningun di e productonan ey pa bende.
E asunto aki a bira un discusion mas grandi cu a spera y awe mainta Haime Hochman lo a bay purba drenta su edificio y a descubri cu e slot di locknan ta cambia. A yama polis pa e cambia e slotnan bek, pa cual autoridad a splic’e pa miho nan regla e asunto aki entre abogadonan, pasobra mester tene cuenta cu ora tin un curator den wega, e ta representante di hues y como tal mester tene cuenta cu esey. Si hues a duna un sentencia pa bende e propiedadnan, ta bira dificil pa polis por stroba e curator den ehecuta un sentencia di hues.
Omaira Britten, kende a identifica su mes como vocero pa abogado mr. Peter Mohammed cu ta na Colombia pa motibo di salud, a bisa awe cu nan ta evaluando awo pa bay recherche pa e curator, pasobra el a kibra porta y cambia slot di un edificio cu no ta di dje y cu e no tin autoridad pa haci esey. Sino ta evalua pa cuminsa un caso sumario contra e curator pasobra e ta purbando pa bende productonan personal di Haime Hochman.
Na final, Britten a haci un apelacion na Minister Presidente mr. Evelyn Wever-Croes pa pone atencion riba e situacion cu ta reinando na Aruba. Hopi negoshinan ta cerando y bayendo bancarota. Na final, semper ta e trahadonan ta resulta esunnan perhudica. Den e caso di La Linda, esey no ta un excepcion, pasobra trahadonan cu 30, 40 y hasta 50 aña di trabou a bay cas asina sin mas. Britten a haci un apelacion riba comunidad, pa e eleccion parlamentario cu ta bin na september, pa haci un oracion y pidi Dios pa guia nos pueblo pa vota bon, pa e tipo di actitudadnan asina no continua!
