Minister Dangui Oduber a confirma retiro di Ezzard Cilie for di Hospital

2256

E specialistanan medico a presenta un mocion di desconfiansa y 95% di e miembronan a vota na fabor di e mocion aki. A present’e diabierna ultimo na Hunta di Supervision di Hospital cu no a keda cu mucho opcion mas cu pidi e Director di Cuido pa e bay cas. Minister Dangui Oduber ta convenci cu un era nobo lo cuminsa na hospital caminda lo atende cu e problemanan cu tin y trece cambio den maneho pa mehora servicio.

For di luna di juni 2019 ya caba Minister Dangui Oduber a expresa su deseo pa busca un remplasante pa Ezzard Cilie, Director “Bedrijfsvoering” na Dr. Horacio E. Oduber Hospital, considerando e hecho cu su contrato lo a termina na december 2019 y a yega su edad di pensioen. E Minister no tawata di acuerdo cu maneho di hospital. Hunta di supervision no tawata di acuerdo cu esaki y hasta kier a prolonga contrato di Cilie y no a percura pa busca su remplasante.

Minister Oduber a informa e hunta di supervision riba esaki y a bisa nan pa cuminsa busca un remplasante for di masha tempo. E situacion na hospital no ta esun di miho y esaki tin di haber cu maneho y tambe e supervision cu tawatin.

Na december 2019 minister Oduber a dirigi un carta fuerte na miembronan di hunta di supervision caminda a pidi nan pa entrega nan retiro! Awe Minister Oduber a bin haya rason pasobra for di hopi tempo ta pidiendo pa cambio y no tawata haya oido. Tur hende a cansa y fada di e manera con hospital ta wordo maneha pasobra hospital tin hopi bon hende den servicio, tin hopi hende kier mira cambio, hopi hende cu curason pa cuido pero simplemente cu e bestuur aki no a mira adelanto.