Ta parce cu den e relato di Servicio di Siguridad (VDA) di aña 2024 a adverti pa influencia Chines na Aruba y na Corsou. Sinembargo un otro investigacion haci recientemente no ta mustra cu tin un peligro manera cu a pasa. Ora cu ta papia di peligro ta referi na peligro economico. Esaki ta algo cu a sali na cla di e investigacion di Clingendael. Nan a constata cu en berdad e presencia Chines riba e islanan ta aumenta, pero no ta mira cu China a logra mas influencia politico a consecuencia esaki.
E riesgonan cu nan ta señala, den e caso di Aruba ta e dependencia di partnernan comercial stranhero y den infrastructura vulnerabel.
Esaki ta resulta for di e informe Chinese Presence and Geopolitical Resilience in the Caribbean Parts of the Kingdom of the Netherlands, cu a publica dia 6 di october pa China Knowledge Network, bou di coordinacion di instituto di investigacion Clingendael.
Den cuadro di esey no por keda sin señala cu e cantidad di negoshi den man di Asiaticonan aki na Aruba ta masha grandi mes. Por menciona principalmente den e sector di supermarket, bar / restaurant y hardware stores.
E investigadonan ta basa nan conclusionnan riba entrevistanan, investigacion na tereno y analisis di documentonan, cu a wordo ehecuta entre januari y mei di 2026 na Aruba, Boneiro, Corsou y Sint Maarten.
Den un publicacion anterior di e pagina aruba.nu a menciona caba loke cu Siguridad Nacional di Aruba a pone den nan relato anual di aña 2024, unda ta mustra riba e dependencia di e grupo aki. A papia di e riesgonan di inversionnan Chines den sectornan di vital importancia. Inversionnan Chines ta un riesgo pa soberania economico di Aruba ta loke nan a bisa, segun e publicacion di Aruba.nu, e tempo ey. ‘
E servicio a indica cu actividadnan economico tambe por wordo uza pa propositonan geopolitico. Specialmente den un economia chikito manera esun di Aruba, e participacion di un entidad stranhero den provision di servicio esencial por tin consecuencia grandi.
VDA a indica cu mester fortalece e capacidad di resistencia di sectornan economico importante contra posibel influencia stranhero.
Un detaye yamativo ta cu, den su informe anual publico, e servicio di siguridad no a menciona ningun empresa Chines specifico ni proyecto di inversion na Aruba caminda a establece concretamente cu tabatin influencia politico.
Pa relato amplio lesa TREMPAN.
