Como parti di e esfuersonan continuo di Gobierno di Aruba pa mantencion di limpiesa, orden publico y siguridad den centro di ciudad, Minister di Husticia mr. drs. Arthur Dowers, a bishita diferente punto den Oranjestad pa observa e trabounan di limpiesa cu ta continua den e area.
E biaha aki, atencion special a bay pa e cercania di Corte y otro puntonan den e vecindario caminda durante tempo a surgi preocupacion relaciona cu acumulacion di sushi, uzo inapropia di e espacionan publico y situacionnan cu ta afecta e ambiente comercial.
Durante e recorido, Minister Dowers a observa e areanan cu ta ricibi atencion, particularmente den cercania di establecimentonan comercial caminda doñonan a expresa nan preocupacion tocante desperdicio y presencia frecuente di personanan cu ta permanece den e area.
E accion ta busca no solamente elimina sushi y mehora condicionnan di e espacionan publico, pero tambe evita cu e sitionan afecta bolbe acumula desperdicio of bira punto di permanencia improvisa. Esaki ta particularmente importante den areanan caminda tin personanan cu ta confronta situacionnan social dificil, incluyendo problema relaciona cu adiccion of salud mental.
Gobierno ta reconoce cu e situacionnan aki ta exigi un acercamento cu ta combina mantencion di espacio publico, orden y siguridad cu atencion apropia pa personanan cu ta den circunstancianan vulnerabel.
Minister Dowers ta considera importante cu e preocupacionnan di comerciante y habitantenan den centro di Oranjestad haya atencion debido, particularmente den areanan caminda e mesun problemanan ta presenta repetidamente.
E recorido ta forma parti di e continuidad di accionnan cu Gobierno a inicia anteriormente den Oranjestad, cu e intencion di atende punto pa punto e areanan mas afecta y evita cu, despues di un limpiesa, e situacion bolbe bay for di man.
E meta ta pa e esfuersonan no keda limita na accionnan incidental, sino contribui na un centro di ciudad mas limpi, ordena y agradabel pa comerciante, habitante y bishitante.
Cu e continuacion di e trabounan, Gobierno ta reafirma su compromiso pa mantene atencion riba e areanan cu mas ta exigi intervencion, cu enfoke riba limpiesa, siguridad y bienestar di comunidad.
