Prome Minister di Aruba, mr. Mike Eman, a yega Corsou diaranson 7 di october, caminda el a keda ricibi na Aeropuerto Internacional di Corsou na Hato pa Prome Minister di Corsou, Gilmar “Pik” Pisas, y Minister di Desaroyo Economico, dr. Roderick Middelhof.
E bishita di Prome Minister Eman ta den cuadro di e conferencia regional Caribbean United in Excellence Summit, cu ta tuma luga di 7 te cu 11 di october 2026. E encuentro ta reuni diferente lider politico di Caribe pa dialoga tocante cooperacion regional, desaroyo economico, inversion y conectividad entre e paisnan.
Prome Minister Eman a expresa su satisfaccion di por participa na e celebracion di 10 di october, un fecha historico pa Corsou, cu ta conmemora su posicion como pais autonomo den Reino Hulandes. Segun Prome Minister Eman, e celebracion ta ofrece un oportunidad importante pa reflexiona riba e relacion entre e islanan y explora con nan por fortalece e lasonan existente. Eman a felicita su colega Gilmar Pisas pa e iniciativa di reuni e lidernan di diferente pais den Caribe, destacando cu e islanan mester orienta nan mes mas riba cooperacion cu nan bisiñanan den region.
E Prome Minister a compara e importancia di e relacion aki cu e cercania entre bisiña, señalando cu ora un persona tin mester di ayudo, hopi biaha ta su bisiña ta e prome cu por brinda asistencia. Den e contexto aki, Eman a destaca cu tin oportunidad pa amplia e cooperacion cultural, economico y comercial, tanto entre e paisnan den Reino como cu otro islanan di Caribe.
Prome Minister Pisas a destaca importancia di unidad regional
Di su banda, Prome Minister Gilmar Pisas a expresa su gradicimento na Prome Minister Mike Eman pa acepta e invitacion pa participa na e celebracionnan y e conferencia regional.
Pisas a destaca cu, aunke e paisnan di Caribe ta relativamente chikito, hunto nan por logra un impacto significativo riba diferente tereno. E Prome Minister di Corsou a splica cu e celebracion di 10 di october e aña aki ta inclui varios lider den region, cu e intencion di fortalece e relacionnan entre e paisnan y amplia e dialogo tocante cooperacion.
Crecemento economico mester traduci den bienestar pa pueblo
Un di e temanan principal cu Prome Minister Eman a destaca ta e necesidad pa e crecemento economico di e islanan traduci den un miho calidad di bida pa e pueblonan di e islanan ABC.
Eman a señala cu diferente pais di Caribe ta registra crecemento economico, actividad turistico positivo y cifranan economico halto, pero cu e prosperidad aki no semper ta yega na tur sector di comunidad.
Segun Eman, e reto ta pa logra cu e beneficio di desaroyo economico ta comparti mas ampliamente den sociedad.
Den e contexto aki, el a haci un apelacion na e sector empresarial y na esnan cu ta dirigi e economia pa contribui na un distribucion mas husto di e prosperidad, incluyendo un recompensa adecuado pa empleadonan cu ta traha duro.
Eman a relaciona e pensamento aki cu e concepto di Common Good, of bienestar comun, un tema cu Aruba ta promoviendo y cu tambe ta forma parti di e dialogo regional.
El a destaca cu e responsabilidad pa desaroyo di un pais no ta limita na crecemento economico, sino cu tambe ta inclui cuido di comunidad, mantenemento di espacio publico y participacion activo di ciudadanonan den mehoramento di nan propio ambiente.
Participacion di Aruba na conferencia regional
Diabierna 9 di october, Prome Minister Mike Eman lo dirigi palabra na e conferencia y participa na un panel di liderazgo hunto cu Prome Minister Gilmar “Pik”Pisas di Corsou, Prome Minister Andrew Holness di Jamaica y Vice-president Gregory Rusland di Surinam.
Diasabra 10 di october, e programa ta inclui un sesion solemne di Parlamento di Corsou, e celebracion oficial di Dia di Corsou y firma di un declaracion conhunto.
E conferencia lo conclui diadomingo 11 di october cu bishitanan na diferente proyecto relaciona cu economia digital, energia, inversion y turismo.
Cu su participacion na e encuentro regional aki, Prome Minister Eman ta contribui na e dialogo entre e paisnan di Caribe tocante cooperacion, desaroyo economico y e importancia di logra cu prosperidad beneficia e comunidad den su totalidad.
