Director interino di SELIBON na Boneiro, Edsel Winklaar, a expresa su actitud positivo tocante e posibilidad di un cooperacion regional entre Aruba, Boneiro y Corsou pa maneho y procesamento di desperdicio. Winklaar a haci e declaracion durante un bishita di Prome Minister Mike Eman na e compania di maneha desperdicio na Boneiro esta SELIBON, caminda a intercambia idea riba e posibilidad di desaroya un modelo regional pa procesamento di desperdicio di e islanan ABC.
Durante e bishita, director interino Winklaar a brinda un presentacion riba e operacion di SELIBON, incluyendo e diferente proceso di coleccion, separacion y exportacion di desperdicio cu ta tuma luga na Boneiro.
Prome Minister Eman tambe a bishita un di e dos dumpnan cu tin na Boneiro esta na Lagoen, caminda a haya un splicacion di e forma cu SELIBON ta maneha diferente categoria di desperdicio y e retonan cu e compania ta enfrenta.
Un di e aspectonan cu Winklaar a destaca ta e importancia di cooperacion pa por enfrenta retonan cu cada isla individualmente ta experimenta.
Segun e director interino, tanto SELIBON como Gobierno di Boneiro ta habri pa explora e posibilidadnan di un colaboracion regional.
“Si bo ta hunto, nos tin mesun pensamento, mesun idea, e retonan bo por kita”, Winklaar a expresa.
Durante e recorido, Winklaar a splica con SELIBON ta organisa su sistema di coleccion di desperdicio. Boneiro tin diferente facilidad caminda ciudadano por entrega material cu despues ta separa y prepara pa su procesamento.
E director a menciona cu cierto categoria di desperdicio, incluyendo desperdicio biomedico, ta colecta y deposita den container special, cu posteriormente ta transporta via lama pa Hulanda, caminda nan ta pasa door di procesamento.
E sistema aki ta mustra un di e retonan cu Boneiro ta enfrenta, paso cierto tipo di desperdicio mester transporta pa exterior pa por procesa den un forma adecuado.
Den e contexto aki, e posibilidad di un solucion regional entre Aruba, Boneiro y Corsou por representa un alternativa cu merece investigacion adicional.
Winklaar a indica cu durante e encuentro cu Prome Minister Eman a intercambia pensamento riba e posibilidad di un proyecto regional y e pasonan cu eventualmente mester tuma pa sigui desaroya e idea.
E director interino a menciona cu e dialogo lo continua cu e partnernan na Corsou, mientras cu tambe ta importante pa mantene contacto cu e instancianan Hulandes cu ta involucra den e proceso.
Un aspecto cu a surgi durante e intercambio ta e transporte di desperdicio entre e islanan. Pa un eventual sistema regional funciona, lo mester evalua e posibilidadnan logistico, incluyendo transporte maritimo di container y e manera cu material por wordo move entre Aruba, Boneiro y Corsou.
A pesar di e retonan cu un proyecto di e magnitud aki por presenta, Winklaar a expresa optimismo tocante e posibilidad di cooperacion.
Segun e director, e boluntad pa traha hunto ta presente tanto na nivel di SELIBON como na nivel di e Gobierno di Boneiro (OLB).
E bishita di Prome Minister Eman na SELIBON a brinda oportunidad pa conoce e experiencia di Boneiro y pa identifica varios punto di interes comun cu por forma base pa dialogo adicional entre e tres isla.
