E asunto di helicopter ta pone minister Andin Bikker manda comunicadonan cu ta bruha su mes completamente. Parce cu ta riba su instruccion e comunicadonan aki ta sali. Ora analisa cada comunicado pa hustifica cada eror, ta gara diferente cos cu no ta berdad.
Mentira #1: Mas cu un luna pasa a menciona cu e helicopter di Polis no t’ey. Eynan caba a sali pura un comunicado caminda a menciona cu e helicopter a bay Colombia p’asina haci cambio di registracion cu matricula etc. Despues di algun dia e helicopter a bolbe y manera a menciona a spera cu e registracion awor ta cambia.
Mentira #2: Ora cu e helicopter a yega algun luna pasa a haci full un show. A bisa cu esaki no ta e helicopter oficial y cu pronto e otro lo bin p’asina bira esun oficial. E helicopter actual ta uno uza pa un television Colombiano. Despues di algun luna a resulta cu ningun helicopter otro lo bin y ta esun bieu aki mes lo keda.
Mentira #3: Andin Bikker como minister a bisa cu ora e helicopter no t’ey of ta for di servicio, e compania lo zorg pa tin un otro na su luga tur momento y cu su piloto. A resulta cu esaki no ta e caso pasobra Diadomingo a keda proba cu helicopter no ta apto pa lanta vuelo y no tin piloto presente na Aruba tampoco.
Mentira #4: Ora a saca potret cu ta polish helicopter mientras cu preso peligroso ta fugitivo, a sali otro comunicado bisando cu ta cambiando matricula etc y cu piloto a bay cu emergencia den un biahe planea. Hopi hende no por compronde con un biahe planea ta alabes un biahe di emergencia. Ademas a bisa algun luna pasa cu a bay haci cambio di registracion cu matricula y awor diadomingo ta bolbe tende den otro comunicado cu ta cambiando e matricula. E pregunta ta cual tabata berdad? E comunicado cu minister a manda e biaha aki of esun di biaha pasa.
E realidad ta cu ora mas mester tin presencia di helicopter pa garantisa e trankilidad y busca e preso peligroso e helicopter no t’ey. E inversion di helicopter cu casi 200 mil florin pa luna tabata innecesario. E minister a bende den pueblo cu ta e helicopter ta salbacion pa caba cu crimen. Awe manera a premira y avisa, esey no ta e caso. Un hende yega lo a beneficia cu e deal di helicopter. Placa di helicopter pa aña ta yega dos miyon florin. Y esaki ta placa cu por a hinca den drecha e shietpostnan of drecha wardanan di Polis cu mester atencion urgente. Un conclusion tin: E prioridadnan di e minister ta robes y no ta na beneficio di e pueblo.
