Awe un parti importante di e sistema pa aparatonan nobo di oxigeno, cu ta escencial pa siguridad di e bomberonan ora di combati candela, a yega na Departamento di Bombero di Aruba. Mirando e duracion di uzo (‘lifespan’), e ekiponan aki eigenlijk mester a wordo cambia ya durante e gobernacion anterior, pero no a logra haya e debido atencion.
No obstante e retonan financiero hereda y e situacion di COVID-19, Minister Andin Bikker cu sosten di coleganan di Gabinete Wever-Croes a logra reemplasa e aparatonan aki cu aparatonan di oxigeno nobo y moderno.
No tabata facil mirando e retonan menciona, pero den cuadro di e maneho cu e ser humano ta central y cu bendicion di nos Creador, tur meta positivo ta posibel.
Minister Bikker ta gradici Sindicato SINBA pa e esfuerso continuo di trece e preocupacion y sugerecianan constructivo di nan miembronan dilanti y tambe e Management Team DBA, cu a logra encamina e proceso pa busca e ekiponan escencial di oxigeno pa siguridad di e bomberonan.
Di e reaccionnan ricibi Minister Bikker a tuma nota cu Cuerpo di Bombero y Sindicato SINBA ta hopi contento cu e logro importante aki. Pronto, asina cu e situacion di COVID-19 normalisa, lo bay tin un momento pa haci entrega oficial di e ekiponan na e bomberonan.
