Minister presidente a reacciona riba e situacion di e sindicatonan, bisando pa no laga oposicion manipula nan. El a hasta indica cu e video a sali di Raymond Knops ta haci pa oposicion di AVP y ta di tempo di april. Gobierno di Evelyn Wever-Croes no a cumpli cu e beleidsplan y CFT a informa esey.
Lider di fraccion, Mike Eman, a reacciona riba esaki y a bisa cu loke minister presidente a haci ta un insulto na tur lider sindical. Ta haci comosifuera un lider sindical mester un empuhe of conseho di un lider politico pa realisa cu su miembronan no por mas cu e entregamento di 12.6%, a base di engaño di Evelyn Wever-Croes. Eman ta di kere cu ningun sindicato di Aruba mester empuhe of conseho di lider politico pa sinti cu su lucha pa empleadonan cu a perde 12.6% a base di engaño di Evelyn Wever-Croes, cu nan tin e derecho, hasta obligacion y responsabilidad pa hiba e lucha aki.
Eman ta repudia e hecho cu un prome mandatario por rebaha nos lider sindical dje forma aki. E ta un falta di respet, un falta di respet pa medio di comunicacion 24ora cu a mustra di midi tur politico nan palabra. Awendia tur cos ta graba, tur cos bisa durante eleccion ta riba Facebook y tur caminda. Lider di fraccion a enfatisa cu media tin tur cos y por saca esey na momento c’un politico contradeci. Den caso di Evelyn Wever-Croes, ta mustra cu e no por biba den era aki. Esaki ta bin door cu era aki bo no por bisa algo y haci otro, pasobra hopi lihe e mentira ta alcansa. E ta un era cu e cosnan ta documenta.
Pa loke ta e 12.6% Eman a expresa cu esaki tabata un creacion di Evelyn Wever-Croes. Hulanda nunca a puntra p’e 12.6%, pero a informa nan cu gobierno di Evelyn Wever-Croes tin un beleidsplan pa baha e gasto di personal. Gobierno di Evelyn Wever-Croes a presenta e plan aki na 2018, di cual 2018, 2019, 2020 a bay y no a haci nada riba e beleidsplan. Esaki ta mas cu claro cu lo mester a para bevordering di famia, contract di trabou di famia, kita pensionado cu famia of amigo. Segun Eman, no a ehecuta nada di e plan pero a probecha di un pandemia pa kita 12.6%. Esaki a base di solidaridad di e mesun sindicatonan cu e ta humilia, cu e ta menosprecia y hasta insulta pa bisa cu nan lucha ta uno politico.
Ora CFT ta hala atencion den su carta, cu Evelyn Wever-Croes no a ehecuta e beleidsplan. CFT a informa gobierno den nan carta pa nan cumpli cu e palabracion. AVP ta sumamente preocupa y awo si bay puntra Hulanda pa duna bek e 12.6%, nan ta bay bisa cu “abo a priminti mi otro cos cu mester a bezuinig 50 miyon”. Nan no a ehecuta esey y a duna e 12.5%, pero awo ta pidie bek y no a voeruit e beleidsplan cu a bini cu ne. Eman tin miedo cu Aruba su posicion ta hopi debil. Si AVP tin di sostene un peticion na Hulanda pa recupera poder di compra na Aruba, nan lo haci esey.
AVP no ta kere den e caminda di Evelyn Wever-Croes di kita placa di pueblo, bin cu mas belasting y enrikece su famianan y tur esunnan rond di dje. Awe mas cu nunca e berdad a alcansa e mentira aki. Hulanda ta mustra riba e parti di priminti algo y no a cumpli cu ne.
Eman ta lamenta cu falta un liderazgo cu por salvaguardia e autonomia y lucha largo cu den e dianan aki a bisa di celebra 35 aña di Status Aparte. E parlamentario a bisa cu na augustus Evelyn Wever-Croes tabata den parlamento y a presenta e negociacionnan cu COHO. E parlamentario a cuestion’e cu locual el a lesa ta cu Hulanda ta determina riba e temanan cu Aruba tin di dicidi, pero CFT y COHO tin di haber cu detaye. AVP nunca a duna Hulanda e poder pa midi riba nan. Pero a palabra cu Hulanda si ta midi riba deficit of schuld, pero Evelyn Wever-Croes a entrega poder na Hulanda cu nan ta dicidi si ta hinca placa den enseñansa of salubridad.
