Mientras Aruba ta wardando, Corsou ta haya ayudo di Hulanda

2974

Siman pasa tabatin un reunion di Conseho di Minister di Reino unda cu a papia di e rol di Conseho di Supervision y con ta bay haci cu e palabracionnan cu tabatin te na e momentonan aki. E decision cu a keda tuma ta cu lo bay tin un control mensual mientras cu lo desvia di e palabracion haci den protocol.

Den e carta cu Gobierno di Aruba a manda, a menciona di e situacion cu Aruba, mescos cu e otro islanan ta aden, pa cual no por cumpli cu loke a palabra. Banda di esaki a haci peticion pa donacion pa cu e presupuesto y prestamo cu lo mester haci bou guia di Hulanda, na un porcentahe abou, pero pa e pago cuminsa despues di tres aña.
E contesta cu Hulanda a duna ta cu ta bay desvia di e palabracionnan, pero no a duna contesta riba e parti di donacion y prestamo na interes abou.

Den un carta cu CFT a saca e siman aki, ta duna conseho na Hulanda riba e apoyo cu mester brinda tanto na Sint Maarten como na Corsou, cu mescos cu Aruba ta paisnan independiente den Reino Hulandes.
Den un conseho duna awe CFT ta conseha pa den caso di Corsou, duna un apoyo pa cu nan situacion di likides pa consecuencianan di COVID-19. Ta papia di un suma di 105 miyon florin pa luna di april y mita luna pa mei cu ta un suma di 72 miyon florin. Pues un suma total di 177 miyon florin. Ta papia pa otorga esaki den un forma di “bulletlening” di dos aña.
CFT lo keda den consulta cu Corsou pa evita burocracia y e placa ta wordo uza debidamente pa evita problemanan.