Minister ta pidi oracion pa pashent hopi malo cu Coronavirus

13680

Tin por lo menos 1 pashent di cual su condicion ta hopi malo den e seccion di Cuido Intensivo (Intensive Care Unit – ICU) den Dr. Horacio E. Oduber Hospital. E ta un di e tres pashentnan interna eyden, pero dos di nan ta den condicion stabiel, pero un di nan ta preocupante. “Mi ta pidi un oracion pe, mescos pa e dos otronan den ICU y tur otro interna y otronan isola na nan cas cu ta luchando pa recupera di e virus aki”, asina Minister Dangui Oduber a pidi awe merdia durante un conferencia di prensa den Cocolishi. E mandatario tabata contento cu resultado di e 12 pashentnan cu a recupera completo, pero e no ta kita bista di esunnan cu ta luchando duro den ICU.

Gobierno awe a confirma cu e casonan di pashentnan contagia a subi cu tres mas y awo a yega 74 caso. Di otro banda ta haciendo mas y mas test y mayoria ta saliendo negativo. E desaroyo positivo ta cu 14 hende a recupera completamente caba di e enfermedad.

E mandatario a splica kico e kiermen cu recupera completo, pasobra hopi ta puntra con por ta posibel cu diripiente awo tin 12 caso recupera siendo cu pa dianan largo e cifra a varia entre 1 pa 2 caso so. El a splica cu caso recupera ta pashentnan cu a test positivo y cu awo, despues cu no ta sinti nada mas, a test nan di nobo y awo e test a sali NEGATIVO.

Asina mes a pidi tur e 12 pashentnan cu awe a tende cu nan no ta pashent mas di Coronavirus pa keda aplica e reglanan di distanciamento social. E diferencia awo ta cu nan NO por contagia cu e virus mas, pasobra ta un biaha so bo ta pega cune, pero nan por ta portado si di e virus y bay pega otro ser keri cu ne na nan cas.