Servicio Meteorologico di Aruba (Meteo) ta informa cu awe nochi shelo lo ta parcialmente nubla, generalmente seco, pero den marduga y mañan lo ta parcialmente nubla cu chens riba awasero breve. Temperatura maximo/minimo lo ta di 32-28 grado Celsius. Biento lo supla modera for di generalmente direccion oost cu forsa 3 te 4 (12 te 30 km/ora, 7 te 16 nudo).
Situacion general di tempo pa proximo 24 ora:
Un ola tropical cu ta moviendo den parti oost-central di Caribe bayendo west, lo pasa cu band’i nort di nos region. No ta exclui un posibel awasero breve den oranan di marduga y di diadomingo mainta.
Condicionnan maritimo – Estado di lama:
Ta spera un estado di lama modera den proximo 24 ora cu olanan for di oost-noordoost entre 3 pa 5 pia, cu e olanan di mas halto na e partinan oost te noordwest.
Tempo tropical significante:
Depresion tropical Omar tabata move oost-noordoost di Bermuda y no ta di importancia pa region di Caribe. Un ola tropical den parti oost di Atlantico, west di islanan Cabo Verde, tin un chens medio grandi den proximo 48 oranan di bira un tormenta tropical mientras e ta move riba awanan di ocean Atlantico.
Pronostico di tempo pa proximo 3 dianan:
Parcialmente nubla cu un awasero breve. Biento lo ta for di direccion oost y modera te basta fuerte, posiblemente fuerte den rafaga. Temperatura max/min lo ta: 34/28 grado Celsius.
