Awe mainta pa 11:15am Wardacosta di Caribe Hulandes, staciona na Aruba, a pidi asistencia di Cuerpo Policial pa un cargacion grandi di pisca cu nan a tuma den beslag na e pier di Zeewijk. Ey e personal di wardacosta a topa cu un piscado cu a baha e piscanan di su boto caba y hinca den un truck cu cooler, cla pa bay bende. Pero, a opta pa tuma henter e cargacion, casi 700 kilo di pisca fresco, den beslag y Fiscal a duna ordo pa destrui tur.
Na e sitio nos a topa cu e capitan di e boto, Robert Laveist, cu ta doño di e piscanan tambe, hopi disgusta y cu un sentimento cu aki ta trata di un persecucion personal di esunnan di wardacosta contra dje. E sentimiento aki no ta biba cerca Robert so, pasobra e top di wardacosta di Aruba ta piscado tambe y ta bira un conflicto di interes serio contra e piscadonan local. Ta persigui e piscadonan local di supuesto delitonan cu nan mes ta comete tur siman, esta di sali di awa teritorial di Aruba, drenta esun Venezolano, pisca na grandi y regresa manera nad’un pasa. Si no sosode algo urgente, e integridad di wardacosta di Aruba lo confronta hopi reto y resistencia aki na Aruba.
Robert Laveist a splica cu wardacosta a laga sa cu nan a detecta un boto Venezolano den e awanan teritorial di Aruba y unda e mes tabata mas o menos 40 pa 50 meter leu di e boto Venezolano. El a admiti di a mira e boto di wardacosta, pero cu nan mes no a bin cerca dje pa papia cu ne. Robert mes a sigui pisca y ora cla, el a bin tera bek, mara na pier di Zeewijk y a cuminsa baha su piscanan.
Aki wardacosta a yega y anuncia cu nan a bin pa un control y a confisca tur e piscanan di Robert Laveist, riba ordo di fiscal mr. Yolanda Pronk, bou sospecho cu e piscado local lo a viola e ley di “overslag van goederen”, esta di lo a pasa cargamento di pisca for di un boto pa otro.
Robert Laveist a duna di conoce cu el a tuma contacto cu su abogado y cu siman pasa caba tabatin un problema similar, ora a confisca su piscanan y su boto. Pero, el a entama un caso sumario (kortgeding) mesora y asina a logra haya su boto bek e mesun dia. Laveist ta convenci cu wardacosta ta contradeci nan mes, pasobra nan a laga sa cu na ningun momento a constata un transborde, ni nan a mira e boto di nan pega cu esun Venezolano. Cu e realidad aki riba mesa, Laveist a instrui su abogado pa cuminsa un otro caso sumario contra Gobierno di Aruba, relaciona cu nan maneho contra piscadonan local.
Piscado Laveist ta lamenta cu wardacosta a lag’e pisca, anto a warda te ora e yega na pier, lag’e baha tur su piscanan, pa e ora nan core yega y confisca tur. P’e e cos ta hole stinki y ta convenci cu ta trata di un problema personal contra dje, su primo Jerwin Peña y Speed Andrade. Y e autornan principal di e persecusion aki, ta e mesun piscadonan den wardacosta, esta Randy Paskel, Revelino “Bob” Kelly y Gino Werleman.
Pa Laveist, e asunto aki ta un berdadero uitlokking nan a haci cu ne, pasobra ta lag’e pisca trankil anto te ora e yega tera, ta bin kita tur pisca cu segun su calculacion ta un cantidad di casi 700 kilo, cu de facto tin doño caba. Mirando cu hopi hende na Aruba ta pasando dificil y hasta tin casonan unda henda ta pasa hamber pa via di e crisis, ta cuestiona e procedura aki unda ta confisca y laga destrui e piscanan, en bes di haci donacion na esunnan den necesidad.
