E sector di salud di Hulanda a manifesta awe diasabra na Malieveld, na Den Haag, pero sin e trahadonan di salud. Nan ta mantene nan mes aleha debi na e medidanan di Coronavirus. En cambio, simbolicamente nan a pone centenares di paar di sapato riba yerba. Aki na Aruba e situacion no ta mucho diferente, aunke no a alcansa un nivel di protesta, toch trahadonan na Hospital ta trahando bou basta presion y cu reduccion di salario. Awe pa colmo gerencia di Hospital a pidi nan pa mas cooperacion!
Na Hulanda e protesta awe tabatin como titulo “Mas cu aplauso”, organisa pa e sindicato y partidonan politico links, a desaroya mas tanto online. E politiconan a duna discurso for di un cas di glas na Malieveld. Den e periodo prome cu Prinsjesdag (15 di september), e sector di salud ta boga pa salarionan structuralmente mas halto y un reduccion di e carga di trabao. E nursenan tambe kier menos regla y mas respet.
Siman pasa a informa cu na Hulanda lo no tin aumento salarial pa e trahadonan den salud, pero cu por conta riba un “coronabonus” un biaha mas pa otro aña. Lo ta un bonus unico di 500 euro. Pa e aña aki, ya a priminti e trahadonan un bonus di 1000 euro. E partidonan di oposicion tambe kier un aumento salarial adicional pa e trahadonan di salud, pero mayoria di Tweede Kamer tabata contra.
Pa loke ta Aruba, e siman aki e trahadonan di Dr. Horacio E. Oduber Hospital a haya un carta di e director saliente Freek Korver, pidiendo pa mas cooperacion. E ta pidi tur trahado, cu excepcion di esunnan cu ta den e grupo di risico, cu mester traha den tur departamento, incluyendo esun cu pashentnan contagia cu Covid-19. Tambe el a haci un apelacion riba nan pa traha a base di un orario di trabou adapta, den cual por varia e orarionan, segun demanda y necesidad den hospital.
Gina Maduro, presidente di sindicato ABV, cu ta representa trahadonan di Dr. Horacio E. Oduber Hospitaal, IMSan, Respaldo y SABA a confirma e carta y a bisa acerca cu dialuna e sindicato lo sinta na mesa cu gerencia di hospital pa atende cu e punto specifico aki. E miembronan ta compronde e presion cu tin y di nan banda ta dunando tur cu tin, trahando oranan largo, sin dianan liber y bou circunstancianan abnormal. Traha den hospital den e temponan aki no ta agradabel tur ora, pasobra e presion y stress eyden ta halto, debi principalmente pa e presencia di Covid-19.
Di otro banda, dialuna ta inicia e prome reunion pa atende cu e asunto di salario di e trahadonan, pasobra na un prome instante a firma un protocol cu gerencia di hospital, den cual e trahadonan ta entrega 5% di nan salario bruto y nan bonus di Pasco, cu hunto ta bira 5.5%. Mesun areglo ta conta tambe pa trahadonan na IMSan y Respaldo. Pero, e miembronan ta scuchando zonidonan persistente di reduccion pisa di parti AZV cu lo por nifica cortamento adicional den nan salario. Esey lo ta un asunto di masha mal gusto, pasobra ta precisamente tur esunnan na “frontline” ta bringando Covid-19 cu alma y curpa, tin biaha exponiendo nan mesun bida. Ta spera cu gerencia di hospital tene e asunto aki masha na cuenta.
