Awe a tuma luga un temblor pisa na Haiti pa cual henter Caribe a activa, pa motibo cu a sintie na varios parti. Hasta a pone un advertencia pa tsunami na paisnan den region di unda e epicentro tabata di e actividad sismico. Lamentablemente na Aruba no a sali ningun informacion relaciona cu e tsunami ni ki efecto e tabatin riba nos isla. Corsou si a emiti un relato algun minuut despues di e temblor. “Tur e aparatonan di midi temblor na Aruba ta daña, o sea fo’i servicio”, asina un fuente den Servicio Meteorologico di Aruba a sigura na nos.
Nos a compronde cu locual si tin, cu ta e unico mashin cu Aruba ta depende di dje, ta un seismograaf cu e unico meteorologo di Aruba, drs. Mack Oduber, tin na su cas. A base di su mashin nos tin informacion di e efecto di movecion sismico cu a afecta nos isla. Aunke cu e no a move hopi, pero mashinnan profesional a capta e actividad si. Aruba ta situa na un distancia di no menos di 748 kilometer for di Haiti, unda nan a sinti un temblor awe cu a midi 7.2 grado riba scala di Richter.
Mester menciona cu desde cu a persigui dr. Marck Oduber politicamente y a mand’e cas, cu Aruba no tin un meteorologo profesional. A busca un persona for di Corsou, pa bin ocupa e puesto tanten cu Oduber ta na cas y ex-minister Chris Romero a impidie di por haci su trabou. Ta wardando awo cambio di minister, pa mira ki decision e mandatario nobo lo tuma, sino lo cana e caminda di Corte. Ironia ta cu minister Romero mes a keda sin trabou, despues cu partido MEP no a pone mas riba lista y ta pendiente pa e bay scol bel y ocupa su funcion atrobe di meneer di scol basico na San Nicolas.
