Drs. Mervin Wyatt-Ras ta desapunta con gobierno toch entrante prome di october 2022 a corta sin piedad den lista positivo di medicina cu e pashentnan tin derecho riba dje den e pakete di AZV. Aki e ciudadanonan tin cu paga pa cierto medicamento.
Ya caba AZV ta urgi tur hende pa pone placa un banda pa paga pa medicina.
Segun Wyatt-Ras e realidad ta cu e carteranan di nos ciudadanonan ta bashi y no tin placa ni pa come, awa y coriente, corda pa resta placa pa paga pa remedi. Ta con nos hendenan por pone placa na banda ya cu nan no tin ni placa. E consecuencia ta cu pashentnan lo no bay cumpra e medicinanan aki y nan salud lo empeora door di cual toch lo keda cu gasto halto di salubridad of lo aumenta esaki.
Di otro banda e gobierno aki no ta corta den su propio gastonan di luho. No ta importa e minister di finanzas cu nos hendenan tin cu paga pa medicina, basta e por core den su auto di dienst di 150.000. No ta importa gobierno cu nos pueblo no tin placa den cartera basta cu minister presidente y su gabinete si por biaha pa New York, Washington, Houston, Colombia y otro luga rond mundo y hasta post portret y frase bunita riba facebook y instagram pa gaba.
Gobierno net prome cu eleccion na 2021 kier a corta den e lista positivo di medicinanan pero door di reaccion di e ciudadanonan cu ya no por a carga mas gasto riba nan lomba y door di protesta di nos fraccion den parlamento pidiendo reunion al respecto a hay’e obliga ta pospone e medida.
Tambe a pospone e medida di eigenbijdrage of contribucion propio, cual medida lo a ocasiona caos, por a trece mas fraude y crea cuido di clase of klassezorg.
Tur esunnan cu a deposita nan voto den MEP y RAIZ awe ta haya bofta tras di bofta den nan cara. Paso nos no ta nan a cambia den hunto cu nan pa tuma medida riba nos pueblo.
Di otro banda por mira con e minister di salubridad, mientras e ta corta den nos hendenan humilde cu tin bijstand, ta cobra pensioen of tin un salario minimo, ta promove klassezorg of cuido di klasse. Por mira den medionan di comunicacion con e ta inaugura practica priva pa esnan cu si tin placa den na cartera, por haya cuido privilegia, beneficiando interes aheno di friends and family di e minister. Por algo cera cu e ta apoyando e practicanan priva cu lo ofrece hasta servicio cu ya caba nos hospitalnan ta dunando. Wyatt-Ras ta puntra su mes si AZV ta envolvi den esaki?
Tin hopi otro alternativa cu lo mester wordo encamina prome cu sigui corta den nos cuidadanonan cu ya caba no tin mas pa duna. Aki Wyatt-Ras a menciona na varios ocasion caba compra di medicina hunto y central na tarifanan mas abou, mehora e proceso di manda pashent Colombia y di menos duracion, mehoracion di cooperacion entre instancianan y profesionalnan cu ta duna cuido y medicinanan, inversion den prevencion y amplia eerstelijnszorg.
Pero e minister aki sin vision y cu a haya tur cos den teblachi door di gobernacion di AVP, no ta tene cuenta cu esnan mas vulnerable den nos comunidad.
E minister aki hunto cu Wever-Croes ta skohe pa castiga zorgverleners cu recorte di 5 miyon pa luna y awor ta castiga pashentnan. Por cierto tin ya caba diferente dunadonan di cuido ta bandonando nos isla door di e medidanan.
Minister di salubridad mester carga su responsabilidad y en bes di corta sinta di clinica priva of bati bel pa pronk cu pluma di logro di gobierno di AVP pa loke ta tratamento di radiologia na San Nicolas, e tin cu busca opcion mas aceptabel pa baha gasto cuminsando cu e gastonan di goederen en diensten di su mes y di su gobierno.
