Mercado di fruta na Corsou t’ey bek. Den pasado esey tambe tabata conoci na Aruba. Na Corsou, despues di pandemia, e botonan ta para caminda cu nan ta bende nan fruta fresco n’e pueblo di Corsou.
Por a nota basta fruta di bunita aspecto, mango pinton, bacoba, mispel, tur cos por a cumpra riba e mercado aki na Corsou, fo’i Venezuela.
Sigur un bunita bista cu tabatin riba e mercado na Corsou, uno sumamente colorido. Aki tur dia tin hende ta sali pa bende nan productonan, no solamente esunnan fo’i Venezuela, pero e localnan mes cu ta bende nan propio cosecha.
A combersa cu un comerciante Venezolano, kende a indica cu tur cos ta bayendo bon. Ta hopi gradicido cu e mercado a bolbe habri. Pasobra tanto Corsou como Venezuela tabatin mester di dje. E mes a bin den barco y aki e ta traha trankil n’e waf na Corsou.
Prijs di e frutanan ta manera semper. Barata. Tur cos di Venezuela ta barata, segun e comerciante. Tin por ehempel awacati pa 3 florin, depende e tamaño. Milon ta na 3 of 4 florin, e comerciante a indica.
Un ciudadano na Corsou a indica cu riba e dia particular aki, e por a mira algun hende cu a bin bek. Pero locual cu a bin bek no ta manera antes. Antes tabatin mas boto, hopi mas variacion di producto y por a nota loke ta bende na boto relativamente barata, e ta bay den supermercado, e ta mira producto mas barata.
Segun e ciudadano, Norwin Ferrero, e sistema ta funciona, e supermercadonan ta dicidi ki prijs nan tin cu bende aki. E cosnan mas miho cu ta bin di Venezuela of di Colombia ta bay supermercado y loke nan no por bende bon eynan, ta bin n’e mercado di fruta.
