Algun siman pasa, Hof a dicidi cu matrimonio entre dos persona di mesun sexo mester tuma luga na Caribe Hulandes, es decir Aruba, Corsou y St. Maarten. Un decision cu sigur no a cay den bon tera cerca hopi hende.
Dos parlamentario, Hendrik Tevreden y Marco Berlis tabata dos cu a bin dilanti y vocifera nan opinion tocante e decision aki. Nan a mustra di ta contra di e decision aki y ta para riba nan ponencia di cu un matrimonio ta entre un homber y un muhe.
Den e un conferencia di prensa, Marco Berlis a trece dilanti cu tabata variso cabesante di diferente scol a dicidi riba nan mes, sin consulta cu DPS ni Gobierno, di core cumpra un curiculum cu ta inclui material homosexual pa condiciona y influencia e muchanan chikito di scol basico. Esaki tambe a tuma luga tambe sin consentimiento di e mayornan, algo cu a lanta hopi disgusto y rabiamento entre e mayornan cu mesora a sali protesta pa e acto inacceptabel aki.
Riba dje, e actonan aki a wordo cometi pa cabesantenan homosexual, cu kier pusha e ideologia di genero aki riba nos muchanan sin permiso di mayornan. Ademas, e mesun scolnan aki a organisa e Cashi Magico, cual ta promove homosexualidad fuertemente bao nos muchanan chikito y vulnerabel, pa asina nan por sigui e ehempel di ideologia di genero. Tur esaki a sucede tras di lomba di mayornan pa asina purba sconde nan agenda ilegitimo.
Segun Berlis, esaki ta algo cu hamas e lo acepta y/o tolera. Scol no ta luga cu mester promove ideologia. Mescos cu no ta promove religion, tampoco ta promove ideologia di genero. Kiermen, ora a introduci e curiculum scondi aki, a hacie intencionalmente cu un agenda propio, y no poniendo e interes di e muchanan ni di e mayornan prome. Mucha mester keda mucha y duna nan tempo y espacio pa desaroya di un forma natural y ora nan ta grandi suficiente, nan mes lo busca nan propio caminda.
Esaki t’e motibo tambe pa cual e ta para contra di e ley di matrimonio homosexual, pasobra e ley aki lo pusha pa despues introduci material homosexual den nos scolnan basico. Nos muchanan den scol basico no tin tino ainda pa e cosnan aki. Laga mucha ta mucha!
Pero door cu e dos parlamentarionan aki a vocifera nan opinion y a expone tur esaki, ambos parlamentario a ricibi menasa di morto! Un menasa serio cu ta expresa cu no solamente a expresa di kier haci daño contra nos bida, pero cu alaves a discrimina nos color, rasa y origen. Un menasa baho, cobarde y anonimo cu kier intimida y silencia nos bos.
Berlis a expresa cu ni esaki lo haci cu e of su colega parlamentario Tevreden lo hala ni un milimeter atras di nan postura y conviccionan. Nan lo sigui sali na vanguardia di e muchanan y lo protehanan. Nan lo sigui vocifera cu matrimonio ta entre un homber y un hende muhe, un diseño cual ta sigura e continuacion di e famia tradicional cual ta e nucleo y forsa di nos sociedad. Nan ta condena e acto baho aki, y ta marc’e como algo inacceptabel y intolerabel.
Sigur esaki no tin espacio riba nos dushi pais Aruba. Discriminacion di origen, rasa, creencia y menasa cu violencia contra un postura democratico hamas por wordo acepta. E menasa aki a bin obviamente di e simpatisantenan of un miembro di LGBTQ+.
Ta pa e motibo aki tambe nan ta den e proceso pa entrega un denuncia oficial cu tur e pruebanan cu nan tin di e menasa aki na recherche manera nan a formalisa nan declaracionan.
“Hamas por permiti niun hende silencia nos. Nos bosnan lo sigui resona cu forsa na fabor di nos dushi pais y pa proteha e inocencia, siguridad y bienestar di nos muchanan aki na Aruba!”. Asina parlamentario Berlis a finalisa bisando.
