MEP-POR-RED: Hulanda ta obliga di yuda Aruba

4366

Si Gobierno no saca un man y yuda e islanan Hulandes di Caribe den tempo di crisis, anto articulo 36 di Statuut ta simplemente un “dode letter”.

Esaki ta aparece den un carta cu lidernan di fraccion di coalicion MEP, POR y RED a manda pa Gobernador Alfonso Boekhoudt, como representante di Rey aki na Aruba.

Ayera caba por a tende un diferencia di opinion den e Conseho di Supervision, entre e miembronan di Caribe Hulandes y Hulanda. Nan tambe a manda un carta pa e representante di Hulanda Raymond Gradus, unda ta mustra nan decepcion. No solamente pa mira e carta cu a saca relaciona cu e ayudo na Corsou, pero cu no ta menciona eyden Aruba y tampoco ta mira nada di nan sugerencia refleha den e decision tuma door di Hulanda. A cuestiona tambe cu ta sinti un falta di solidaridad pa cu e paisnan den Reino manera cu Hulanda ta expresa pa otro paisnan.

E carta cu e fraccionnan den Parlamento a manda pa Gobernador ta bay den e mesun direccion ey. Ta papia di e crisis grandi cu COVID-19 a causa pa tur e islanan Hulandes. . Pa e motibo aki nan ta haci un apelacion pa haci uzo di articulo 36 di Statuut cu ta papia di “hulp en bijstand” y pa garantisa e derechonan fundamental  di e ser humano, manera cu ta para den articulo 43 inciso 2 di Statuut.

Loader Loading…
EAD Logo Taking too long?

Reload Reload document
| Open Open in new tab

Download [1.36 MB]

Ta splica cu no tin discusion e impacto cu e crisis di COVID-19 tin riba finanza di Aruba y e comunidad. E ta bini despues di e crisis di Venezuela pa cual Aruba a pidi ayudo caba y cu te ainda no a haya esaki. E rapportnan traha door di diferente instancia internacional ta mustra e necesidadnan urgente di e ayudo necesario y esencial pa evita cu e situacion ta empeora.

A mustra cu inmediatamente despues di aproba e presupuesto 2020, a haci un apelacion na Conseho di Minister di Reino pa ayudo basa riba articulo 36 di Statuut di Reino. E articulo aki ta papia di “dat de landen binnen her Koninkrijk elkander hulp en bijstand te verlenen”. E ta un derecho, e lidernan di fraccion ta enfatisa den nan carta. E statuut aki a wordo crea despues di 2da guera mundial pa soluciona di un forma mas eficiente y efectivo e crisisnan. “E crisis di COVID-19” ta hustamente un di e crisisnan cu e Statuut ta referi na dje …. Mas tarda pa tuma un decision, mas grandi e consecuencianan ta pa e poblacion di Aruba.”

Ta expresa cu no ta nada contento cu declaracion di Minister Knops na prensa, unda el a bisa cu e ayudo brinda ta simplemente den forma di un prestamo. Esaki ta contrario na e caracter obligatorio articulo 36 di Statuut y e situacion financiero precario cu Aruba ta aden. E decision aki riba dje, ta bay totalmente contra e pensamento di Hulanda  pa duna e paisnan hustamente un donacion, cu esey ta mas bentahoso cu un prestamo.

Tardanza pa tuma un decision ta trece stabilidad di e pais na peligro. “Pa nos como representante di pueblo ta incomprendibel ta trata di core pa su responsabilidad basa riba articulo 36 di Statuut di Reino.” Na final ta bisa cu esaki ta prome biaha  den historia di Aruba cu e Gobierno di e isla ta haci un apelacion riba articulo 36. Un articulo cu ta skirbi cu e meta pa tempo di crisis un yuda otro. “Si esaki no ta e caso, e articulo aki por wordo mira como un “dode letter”. Statuut ta e derecho di mas halto di Reino y ta fiha bon cla con den cooperacion entre e paisnan di Reino por cumpli cu e obligacionnan pa cu otro.”

E sla final den e carta ta ora cu e parlamentarionan ta bisa cu ta conoci cu Hulanda a yuda diferente pais na mundo financieramente den tempo di crisis, manera entre otro e problematica na Venezuela. Pero diferente peticion di Aruba pa ayudo no a duna resultado positivo di Hulanda. “Hulanda tin e derecho pa asisti paisnan pafo di Reino financieramente, pero pa cu e paisnan den Reino tin un obligacion conforme e Statuut. Ta sumamente importante cu e relacion entre e paisnan den Reino ta bon, mas ainda den tempo di e crisis di COVID-19. P’esey nos ta acerca boso pa evita escalacion di emocionnan entre e paisnan.”

Nan a bisa cu un delegacion chikito ta dispuesto pa intercambia di pensamento cu Gobernador.