No ta desconoci cu Aruba mester a implementa un crisisplan social, mirando e decadencia cu e gobierno nobo a encontra na 2017 ora cu pueblo a rechasa Gabinete Mike Eman 2, asina Hendrik Tevreden, miembro di Parlamento pa partido MEP ta indica. El a bisa esaki despues cu ayera Siegfried Kelly, invalido den un caso sin awa ni coriente, a menciona nomber di e Parlamentatio cu conoce bon, pero toch nunca a saca un man yud’e. Awe e Parlamentario a sali menciona cu entretanto, despues di e publicacion riba 24ora.com, cu a core busca un luga pa interna Siegfried aden.
Mientrastanto Hendrik Tevreden ta hustifica cu pa por a implementa e Crisisplan Social, unda cu mas di binti departamento tin di colabora cu otro den un forma nobo, sin conta e lista largo di personanan afecta cu tin gran urgencia pa ricibi ayudo, bo por imagina cu no ta un trabou facil. Sinembargo Gabinete Wever – Croes a tuma rienda di e situacion y Parlamento na su turno a vota na fabor pa fondo pa un crisisplan social. Pero tin un cantidad grandi di hende cu ta involucra, cu kisas no ta mira tur dia. “Un di nan ta mi colega Darlaine Guedez Erasmus, un politico hoben profesional cu un acogida tremendo, pero riba tur cos, cu un curason grandi pa su prohimo”, asina Parlamentario Tevreden a indica.
“Den e caso di Siegfried, e ciudadano cu e media ’24 ora.com’ a bay haci un reportahe di dje na Meiveld, un ex-cliente cu ambos Darlaine y mi persona conoce hopi bon y a yega di atende cune den nos profesion anterior. A hay’e den un situacion mas dificil di loke e ta conoce caba. Siegfried apesar di su otro problemanan, semper a persevera pa yud’e. Y awe el a ricibi su ayudo tambe! Awe Siegfried ya no ta su so na su cas. El a haya un hogar na un cas di anciano priva unda cu nan lo cuid’e y dun’e e atencion cu e mester. Mas ainda, su ruman homber tambe lo ricibi e ayudo pa por tin locual e mester na su cas. Danki na mi colega Darlaine, cu ta un di e motornan tras di ministerio social di Minister Glenbert Croes cu a ocupa su mes pa logra esaki”, segun e Parlamentario a indica.
Tabata un teamwork di entre otro CAA, Inloophuis, DAS y otronan cu a brinda e ayudo manera cu e crisisplan ta propone. Darlaine ta un trahado social hopi dedica y apesar e ta haciendo hopi mas pa ciudadanonan, e no lo sali proclam’e, p’esey nos ta hacie p’e y pa asina mes momento kita e percepcion robes cu medianan corumpi kier pa pueblo kere, di acuerdo cu Tevreden.
“Y mi tin di bisa cu colega Darlaine Guedez Erasmus a demostra cu asina aki nos ta mira y sinti cu e speransa pa Aruba su adelanto y bienestar ta grandi”, asina Parlamentario Hendrik Tevreden a termina bisando.
