Un situacion serio, tenso y cu menasa di morto a tuma luga na eerste hulp na momento cu un grupo grandi a topa otro cu intencion di regla cuenta.
Na sitio a compronde cu e personal di siguridad a pidi presencia urgente di polis pa un discusion formal tumando luga. Esaki a sosode den careda di 3:00 am riba tereno di hospital. Te asta menasa di morto a cay den direccion di e personal di siguridad.
Diferente patruya a presenta mirando cu tabata papia di dos diferente gang cu lo a confronta otro den parkinglot. A trece un persona herida, pero no cu herida di bala.
Mesora polis di districto di Noord a pidi transporte pa dos persona deteni na sitio. A pidi dos diferente transporte pa nan por a bay separa y na diferente warda.Tambe a compronde cu a pone slachtofferhulp como tambe departamento di recherche na altura pa bin atende cu e situacion serio aki. Te na e momento aki ta papia di un criminal basta pisa cu a caba di sali for di KIA.
Ta un persona cu autoridad ta concidera ‘vuurwapen gevaarlijk’ y cu tabata envolvi den caso di tiramento anteriormente, e sospechoso Stephan Claudio Martina a sinta un castigo pa e.o. posesion di arma di candela, den e caso unda cu a tira riba e hoben R.C. dia 21 di september, 2018. Fiscal a pidi 8 aña y Corte a dun’e un condena di 8 aña pa intento di asesinato.
Relaciona cu un otro caso caminda cu Jason Mathilda na februari, 2010 a haya un castigo di 8 aña pa asesinato cometi (na 2009) riba Gilbert Regales (tata di Stephan Martina). Durante of despues di un discusion el a hinca Regales na su garganta cu consecuencianan fatal.
Martina a sinta su castigo y apenas ta den libertad ta hay’e den problema cu husticia un biaha mas.
E dos autonan tambe nan a cosfisca pa mas investigacion. No ta confirma pero muy probablemente cu e incidente aki tin di haber cu e caso di tiroteo cu a tuma luga riba tanki di Alto Vista. Informacion cu a ricibi durante dia di awe ta cu ambos sospechoso a recupera nan libertad y ta para riba cu nan no tin nada di haber cu e caso di tiramento en cuestion.
