“Riba diabierna 10 di juli ultimo Minister Presidente a bay bela yen Hulanda pa atende Conseho di Minister di Reino cu Aruba no por acepta ni e landenpakket ni e 2 rijkswetten, pasobra esaki e.o. lo ta mina e autonomia di nos pais. A yega na un entendimento cu e conseho, cu Aruba mester mas tempo pa asina haya e draagvlak necesario. Pues MP supuestamente lo a busca draagvlak pa condicionnan indecente cu Hulanda a mara na un posibel fiansa”, asina Candelario “Booshi” Wever, lider di partido UPP, a skirbi awe den un relato.
Ta conoci cu pa basta tempo caba Hulanda a tuma un postura intransigente den su negosacion cu gobierno y a laga sa explicitamente cu no lo tolera ningun tipo di retraso den implementacion di medidanan. E exigencianan Hulandes tabata conoci for di prome cu e pandemia a asota mundo. Hulanda a hasta menasa cu un “aanwijzing” si Aruba no cumpli cu e exigencianan Hulandes.
MP pues tabata bon na altura, pero como subrina di Betico Croes dfm, su persona mester a busca un forma pa por a “bende” entrega di nos Status Aparte cerca nos pueblo y alabes gana tempo pa keda cumpli cu sponsors y amigonan di partido, prome cu accede na e condicionan indecente hulandes. E postura intransigente Hulandes ta lamentabel, pero UPP por compronde pakico e relacion entre Hulanda y Aruba a yega na un “dieptepunt”. E falta di e incumplimento di palabracionnan haci for di 2014 bin ariba a causa cu NO TIN CONFIANSA den e gobierno di Aruba y esnan responsabel pa esaki ta e gobiernonan di AVPOR y POREDmep.
Den tres aña e gobierno dirigi pa MP no a introduci e reformanan cu lo mester a percura pa un “duurzame en gezonde overheidsfinanaciën”, es mas no a cumpli cu e supuesto “plan di gobernacion” cu a wordo presenta cu masha fanfaria na comienso di e gobernacion. UPP desde e prome momento cu nos a tuma nota di e condicionnan indecente y absurdo di Hulanda, nos a manda laga nos voz resona y manda cartanan pa e instancianan involvi den henter e asunto aki.
Varios partidonan politico a mustra nan disgusto y den Parlamento hasta un mayoria grandi a vota contra e acuerdo aki. Pero esaki no a dura largo, ya cu e MP di Aruba no a tene cuenta cu e mocion y a sigui “negosha” cu Hulanda. Y aki un biaha mas UPP a declara cu esaki ta un acto contra e bienestar di e pueblo arubano y contra e derecho sagrado di e pueblo, esta e derecho inalienabel di autodeterminacion! Un derecho ancra den articulo 73 di e Carta Magna y varios otro resolucionnan di Nacionnan Uni.
Den principio di luna di november 2020 e “spindocters ” di e gobierno POREDmep a cuminsa cu un campaña pa hustifica entrega di nos autonomia. A cuminsa papia di un negosacion pisa unda a logra un acuerdo pa FIANSA Hulandes mientras ta mantene autonomia di nos pais. Sinembargo ora cu nos a pasa riba e documentonan cu nos a ricibi, pa nos sorpresa grandi nos mester yega na e conclusion cu aparte di a cambia algun palabra y komma y “hoofdletters” ningun cambio “INHOUDELIJK” a ser logra.
Mescos cu den e prome version di e condicionnan Hulandes, un ENTIDAD Hulandes lo bay goberna Aruba pa por lo menos 6 aña. E ta un “body” Hulandes, mescos cu antes West Indische Compagnie (W.I.C.), cu lo bai tuma e desicionnan cu NAN ta husga ta bon pa Aruba. Aruba mag di opina pero ta wordo spera di Aruba pa bay di acuerdo cu tur loke e COHO (hopi CHE) aki propone SINO no ta haya e siguiente tranche!! Pues Parlamento y Gobierno tin un solo escoho: “TEKEN BIJ HET KRUISJE”!
E “tigernan” di papel di MEP den e Parlamento “NOBO y OTRO” a guli manda abou y a bay di acuerdo cu esaki. A yega tempo pa nos pueblo coy e bandera, manera proponi den pasado pa Betico Croes dfm y rechasa e acuerdo “TRAICIONERO Y STRANGULANTE” cu ta mustra cu lo bay wordo firma riba e BLACK FRIDAY 13 di november 2020. Nos pueblo mester exigi respet pa nos Status Aparte, pero alabes exigi un gobierno drechi cu tin interes general na pecho y ta sali berdaderamente na vanguardia di interes di e SER HUMANO.
Manera ta ser bisa riba caya: ni berde ni geel! UPP tin un programa ambicioso pero realistico. Pues ban siña biba cu e “traicion” aki, pero ban hunto hacie di corto duracion, hala dos stap atras y core cu esnan cu a percura pa awe no tin confiansa. Manera Churchill a bisa: “NEVER WASTE A GOOD CRISIS”!
