Ayera Gobierno di Aruba a dicidi pa cera e frontera cu Venezuela pa un luna largo. Pero pa e medio Hulandes “De Dagelijkse Standaard”, e problema aki ta e intolerancia y xenofobia di e Arubiano, cual naturalmente ta inaceptabel. Segun e medio, e frontera ya tabata cera pa loke ta e islanan bisiña, pero esaki a bin di Venezuela mes.
Gobierno Venezolano a haya cu no tabata un bon idea cu su poblacion kier a bandona e pais den forma masal. Finalmente Venezuela a dicidi di habri e frontera bek, pero di un otro banda, Aruba mes a dicidi di cera esaki.
E medio ta bisa tambe cu Hues a tik Aruba riba su dedenan, pasobra e Venezolanonan naturalmente por pidi pa asilo cu un luga di keda, cuminda, ayudo medico y educacion pa nan yiunan, te ora cu nan peticion wordo atendi. Esaki ta loke na Aruba no tin mucho gana. Nan tin miedo pa e orden publico, siguridad y e bienestar general di e isla, e medio ta sigui bisa.
Apesar cu esaki ta un tiki exagera, e medio ta continua, si nan mester kere e siguiente declaracion:
Na Venezuela den e ultimo añanan, casi 3,4 miyon di persona a huy di e pais. Gobierno di Aruba a bisa cu e pais bisiña ta pasando den un crisis cu tin “consecuencianan devastador.” Aruba ta tene na cuenta cu “vol is vol” y simplemente no tin luga mas pa tres persona y algun miembro di curpa. Fuera di Aruba, tin algun pais cu ta nenga di habri nan frontera. Boneiro y Corsou ta tene nan fronteranan cera, mescos cu Colombia, e medio ta finalisa.
