Dia 9 di mei ultimo nos a publica un articulo tocante retiro ‘en bloc’ di Colegio di Curator di Universidad di Aruba. Den e articulo, nos a menciona Armand Hessels como un persona di confiansa di Minister Lampe cu lo por ta un di e candidatonan pa e posishon na Universidad of den Colegio di Curator. Awe e docente a refuta e alegacionnan.
Armand Hessels a bisa cu desde su retiro for di Partido RED na 2010, cu e no ta ‘un persona di confiansa’ di Minister Lampe ni di partido RED.
Na di dos luga, Armand Hessels ‘no ta haya posishon’ na Universidad of den e Colegio di Curator. Ningun hende a pidi’e y e mes no tin ningun aspirashon pa tal. Ademas, nunca e lo acepta eventual ‘proposishon dor di Ministro’.
Segun articulo 7, inciso 2 di Ley di Ordenansa Universidad di Aruba, e Colegio di Curator ta propone candidato pa remplasa esnan cu a desocupa nan luga. Minister no ta mete den e parti aki. Intenshon di e ley aki ta pa evita metemente politico den asunto di Universidad. Eliminashon di metemento politico den cualke organisashon ta hustamente un di e metanan principal di Armand Hessels como presidente di Fundashon Gobernashon di Calidad Aruba (FGCA).
Den e caso specifico aki, e ultimo aki ta casi imposibel, despues cu henter e Colegio di Curatornan a dicidi pa tuma retiro “en bloc” sin nombra un otro na su luga. Pues awo ta Minister mes lo mester bin cu candidatonan pa yena tur e vacaturanan habri eyden awo.
