Tin un trend nobo cu ta sosodiendo, aunke cu pa basta tempo esaki ta tumando luga. Ta trata di huurmento di auto cu plachi number A. Un persona mayor di edad ta huur auto y ta duna e yabi na esunnan menor di edad, pero ta cobra e hobennan aki.
Hopi hende ta huur auto, pero a ripara cu asina fin di siman ta of a yega, ta huur auto cu esunnan cu no tin rijbewijs y ta menor di edad. Esaki ta algo cu ta pasa tur weekend. Un mayor preocupa a pasa den e situacion aki cu su yiu.
El a indica cu su yiu y amigonan, cu tin e edad di diescinco aña, a laga un hende grandi huur un auto pa nan. E ta cuestiona e echo cu e persona ta cobra e muchanan 150 florin pa dia y asina ey e mes ta gana 450 florin den tres dia. E muchanan ta huur e auto den un grupo di cinco por ehempel. Esun cu ta huur e auto no ta worry cu ta mucha menor di edad nan ta, pasobra e mes a gana s placa sin tene na cuenta riba e peligernan.
E mayor a expresa cu e mes a gara su yiu c’un amigo den un auto di huur. Mi a gara nan con nan a haci tur cos pa no haya sa cu nan a huur un auto. Nan tabata para auto leu y pa asina e mayornan no ripara. No ta prome bes e mayor a gara su yiu ta haci esaki. E ta preocupa con peligroso e cos aki ta, pasobra e amigonan y su yiu a accidenta cu auto di huur. Como e ta e mayor, el a acerca e persona cu ta huur auto. E situacion a termina te na polis, pa motibo cu un persona a huur e auto y a pasa e yabi n’e hobennan aki.
Den caso di e auto cu e hobennan aki a dal, segun e mayor preocupa, polis a informa nan bon cla como no ta trata di ladronicia ni nada, nan no por haci nada. Polis a takel e auto y e doño di auto a hay’e cu gasto, pa motibo cu otro hende a huur auto den nomber di e muchanan.
E mayor aki ta pidi pa tur cu ta huur auto tene cautela ora di huur auto. E kier pa polis ta atento riba e situacion aki. Tambe esunnan cu ta huur auto pa menor di edad, pa nan no haci esey pasobra e ta un peliger y tin su consecuencianan.
