Tin biaha nos ta tende di existencia di cierto cos, pero nos tin duda cu mente di hende por yena cu tanto maldad. Ya caba ta pas’e bao di capa di informacion y proteccion. Nos ta bibando den un tempo cu mas cu nunca ora nos tende di algo malo, e prome cos cu ta sali for di hende consciente y responsabel su boca ta “Dios Tene Misericordia.”
Ta ken por a pensa cu lo yega e tempo cu e muchanan tin tanto urgencia, pa haya informacion tocante perversidad sexual na scol? Pasobra esey ta e nomber cu tin cu duna e asunto aki, pasobra esunnan cu a produci e articulonan aki ta pensa cu nan informacion por ta bon. Pero di berdad ta haci hopi daño na mente di e muchanan.
E mentenan perverso y satanas kier pone e muchanan trompica for di chikito, y haci nan homber- y muhenan di curason dobel, kende nan lo no tin respet ni tampoco temor di Dios. Na Hulanda y Merca tin e bukinan ta circula cu informacion hopi degenera pa e muchanan di for di edad di cuater aña, cu por cambia nan comportacion sexual for di chikito, en bes di duna nan un chens pa nan mes dicidi esey ora nan ta grandi.
Awor ta den man di ken nos tin confia nos yiu- y nietonan pa un enseñansa sano?
Pero laga nos corda esaki:
Sumpiña y trampa ta den caminda di e hende perverso, esun cu ta warda su alma lo keda leu for di nan.
Y nos tin di haci lo siguiente:
Instrui e mucha den e caminda cu e mester cana, y hasta ora e bira bieu e lo no aparta for di dje (Proverbionan 22:5+6).
Y esaki ta bira algo hopi pisa p’e mayornan bay deal cu ne. Pasobra un mayor responsabel lo tin di tene cuenta cu locual e ta sembra na cas, cual ta honra, respet, balor y moralidad. Ta core hopi chens pa basha abao ora e mucha yega scol, ya cu e mucha su mente ta yena cu informacion di maldad cu no tin urgencia di drenta su bida.
Laga mucha keda mucha, pasobra nos ta mira y kere cu ta solamente Dios por impedi cu e materialnan aki por keda sin yega Aruba. Y sin wordo exponi na nos muchanan na scol, pasobra nos ta biba den un mundo caminda hende ta sinti nan mes como heroe ora nan apoya maldad y inmoralidad.
E asunto aki ta tristo, pasobra nos ta creando un generacion cu curason dobel. Y ta para skirbi cu hende cu curason dobel no por spera nada di Señor, pasobra nan ta inconstante den tur nan camindanan (Santiago 1:8 y Santiago 4:7+8).
Ta para skirbi den 2 Timoteo 3 versiculo 1-9 cu den e ultimo temponan lo bini tempo trabahoso, y kico tin mas trabahoso cu esaki? Caminda nos tur ta tende locual tin nan caminda pa nos yiu- y nietonan, cual nos tur sa cu ta nos preto di wowo. No solamente di nos como mayor, pero Dios tambe ta stima mucha.
Ma Hesus a bisa: Laga e muchanan bini cerca mi, pasobra e reino di cielo ta pertenece na esunnan manera esakinan (Mateo 19:14). Y ken cu ricibi un mucha asina den Mi nomber ta Ami e ta ricibi, ma ken cu haci un di e chikitinnan aki cu ta kere den Mi trompica, ta miho pe cu un piedra di molina pisa wordo colga na su garganta y cu e wordo hoga den profundidad di lama (Mateo 18;6).
Dios tene misericordia.
Sinceramente,
Pastoor Marcel Balootje.
