Falta apenas tres luna pa e prome gran conmemoracion di 160 aña di Emancipacion di Esclavitud di Historia Hulandes di Esclavitud, na Aruba organisa pa Gobierno di Aruba. Te awe e gruponan y personanan clave na Aruba cu semper a percura pa informa y conmemora Emancipacion di Esclavitud Hulandes y e Historia Afro-Caribense di nan antepasadonan y secuestra y forsa den Esclavitud, no a wordo inclui den e celebracion aki.
A pidi nos hendenan pa skirbi nos ideanan pa cu e conmemoracion riba dia 19 di januari 2023 y despues no a tende nada mas. Esaki ta un eror y berguensa grandi pa Gobierno Wever-Croes-Arends, cu riba dia 19 di december 2022 a acepta e excusa comosifuera e ta representante di e ser Africano.
“Pa despues yama ami, durante su rueda di prensa como Minister Presidente di Aruba, un mucha cu ta lanta para pa canta durante di les? Asina e ta defende e derecho constitutional di un cuidadano di Aruba? Un studiante cu a prueba cu e tin suficiente conocemento di ley ora el a gradua y riba dia 2 di december, cu ta Dia Internacional di Abolisacion di Esclavitud y a dedica su diploma na su antepasadonan den e mesun aula di UA”, asina Gisele-Mireille Sint Jago di Partido Pueblo Prome, a indica.
Exclusion di decendiente Africano
Bou liderazgo di Minister di Cultura, Xiomara Maduro, ta keda insisti di exclui personanan conoci como scholars, educadornan, activista, autornan, artista y politiconan cu semper a promove y defende nan historia, for di e organisacion di e conmemoracion aki. “Mi no ta papia pa mi mes so, ora mi bisa cu ami no kier wak un Evelyn Wever-Croes, un Ursell Arends ni un Xiomara Maduro of Luc Alofs riba escenario dia 1 di juli 2023, papiando di e dolor y efecto di esclavitud. Ta mescos cu bo ta pidi e descendientenan di Pieter Menten y Toon Soetebier, ambos condena pa nan accionnan criminal durante di dos Guera Mundial, organisa un conmemoracion pa e victimanan di GMII. Cu bo ta esun ‘democraticamente’ poni riba e asiento, no kiermen cu bo mester ta esun sinta na mesa of cu ta hiba palabra ora ta toca Historia di Esclavitud. E siman aki mi a wordo invita pa un cita di conocemento cu VNO. Un tremendo oportunidad pa nos informa nan di locual ta pasando den e preparacion di e commemoracion di esclavitud.”
Invitacion cu topico robes
“Rectorado di Universidad na Aruba tambe a invita mi e luna aki, pero solamente pa papia di mi accion, cu pa colmo nan a yama un ‘voorval’ y ‘ordeverstoring’. Riba agenda a pone pa papia tocante con mi protesta a afecta studiante y docente, con ami por participa na actividadnan di UA den futuro y mi expresion den (social) media. Mi a reaciona cu e peticion pa cambia e topico pa: ‘Manifestacion (protesta) a base di articulo I.12 inciso 3’ y ‘Expresion di descontento’. Pasobra mi no por acepta un invitacion cu ta pone mi incrimina mi mes. Tambe mi a sugeri algun punto extra riba agenda: E procedura di preparacion di e College Extraordinario, Reflexion di UA riba nan actuacion contra mi persona, nan reaccion den prensa y e conmemoracion di Historia di Esclavitud na UA. Aunke nan a bay di acuerdo pa cambia e titulo di e reunion pa ‘vreedzaam protest’, tur cuater punto cu mi a sugeri a wordo bari for di mesa. Hasta mi a wordo informa door di un docente di UA, prome cu mi a ricibi e invitacion di rectorado, cu e ta premira cu lo bay tin docente na Universidad cu lo no kier guia mi ora mi mester skirbi mi tesis. Cual ta un forma di intimidacion.”
Efecto di colonialismo
Esaki ta exactamente locual nos, decendiente di esunnan esclavisa, ta papia over di dje, ora nos bisa cu tin un manera ‘fini’ caminda nos ta wordo demostra cu nos lo no ricibi un trato igual: Exclusion di e conmemoracion, nan kier bo conocemento, bo ideanan y bo talento, pero no ta duna bo e ‘regie’. Intimidacion, cu lo por tin cierto consecuencia indesea; un trato diferente caminda bo sugerencianan no ta ni wordo considera cual ta net e efecto di esclavitud y colonialismo cu Premier Rutte a papia over di dje durante su excuus. E parti mas grave di colonialismo, ta e echo cu nan kier laga nos pensa cu nos no tin poder. Cu nos historia, persona y opinion no ta conta. Cu nos ta nos so. Pero un mente bon educa y informa semper lo haya un solucion. “Mi a lanta mi so dia 31 di januari 2023, pero mi no ta para mi so den e lucha aki mas!!”
