Na e momento aki e preparacionnan ta den su ultimo fase pa introduci un ruta di trein electrico entre Miami y Orlando. Ta trata aki di un servicio di trein ultra moderno y mas lihe, cu un velocidad di riba 130 miya pa ora. E trein electrico aki lo por hiba Rubianonan for di Miami pa Orlando den dos ora.
Por subi e trein sea na Miami, Aventura, Fort Lauderdale, Boca Raton of West Palm Beach. E trein ta coriendo caba den algun di e ciudadnan aki pero e ruta di Orlando lo cuminsa na final di juli 2023.
For di e oficina di 24ora.com pa e continente Mericano, nos director Mark-Benson Denz tabatin e oportunidad di subi den e Brightline Train y haci un recorido.
Na banda di e opcion di biaha pa Orlando, por hasi uzo di e trein tambe pa bishita un di e ciudadnan na Florida. E parti atractivo ta cu na cada ciudad tin varios “shuttle” electrico cu ta hiba bo den e ciudad. E shuttle ta busca bo bek tambe pa asina tuma bo trein di regreso.
Biniendo bek riba e ruta di Orlando, esaki lo tin un costo di $79 pa persona. Tin un pakete special pa famia di cuater. Esaki tin un costo di $200 pa ful e famia. Lo tin mas di 10 diferente orario pa scoge for di dje.
Por cumpra ticket via e app of na e stacion mes.
