Diaranson dia 15 di mei, Prome Minister Evelyn Wever-Croes hunto cu representantenan di DOW, a bishita e sitio unda cu ta construyendo Hotel Secrets na San Nicolas. Motibo di su bishita tabata pa observa con e proyecto ta avansando. For di e repesentantenan di Hotel Secrets, Prome Minister a haya splicacion amplio di e diferente fasenan di e proyecto. Tambe nan a notifica Prome Minister cu pa fin di aña 2024, nan lo kier keda cla cu e construccion di e prome 300 cambernan y habri esakinan prome cu aña caba.
Prome Minister a indica cu e proyecto ta progresando bastante bon y ta mustra cu lo logra nan meta pa fin di aña. A pesar cu e proyecto aki a sufri hopi tardansa pa motibo di e diferente discusionnan cu tabatin rond di dje, mester a coregi varios asunto na caminda pa asina acapara e preocupacionnan di tur hende.
“Sinceramente, Hotel Secrets na San Nicolas ta un proyecto sumamente grandi pa Aruba en general pero specialmente pa San Nicolas. Cu e inversionistanan priva a mira un luga pa nan pone nan riesgo, inversion y nan placa pa trece un desaroyo pa Aruba, ta algo cu nos ta aprecia hopi, specialmente pasobra esaki ta bay trece e progreso y bienestar pa esnan cu ta biba parib’i brug, cu ta algo cu ta haci ami hopi contento. Mi ta hopi impresiona con lihe e construccion ta bayendo y mi ta sigur tambe cu pa fin di aña e hotel ta keda cla pa habri su prome 300 cambernan”, asina Prome Minister Evelyn Wever-Croes a expresa.
Hyatt Regency lo maneha Secrets Baby Beach
Locual hopi hende no sa, of kisas no ta realisa, cu Hyatt Regency a cumpra e compania hotelero cu lo opera e hotel. Three Rivers Real Estate como tal lo ta e doño di e edificio pero operacion diario di e hotel lo ta hunto cu e cadena Hyatt, cu lo uza su plataforma di reservacion pa tur su miles di huespednan.
Tocante Secrets Baby Beach Aruba
Tabata na november 2019 cu AMResorts®, un compania di Apple Leisure Group® (ALG), a anuncia un acuerdo nobo pa construccion di 600 camber pa e proyecto Secrets Baby Beach Aruba situa cerca di Baby Beach, na San Nicolas, como parti di e cadena di Secrets® Resorts & Spa. E grupo tras di e proyecto ta Grupo Martinón, estableci na Aruba via e compania Three Rivers Real Estate VBA.
E intencion ta pa traha 600 camber prome, evalua e proyecto y despues amplie cu 300 camber mas! Ora a anuncia e proyecto na november 2019, a bisa cu lo cab’e na final di aña 2021. E proyecto completo ta costa alrededor di 200 miyon dollar Mericano. Pero, pandemia y despues batayanan legal den corte ta haci cu awe na 2023 ainda falta bastante ainda pa por finalisa e hotel gigantesco aki!
E hotel ta destina solamente pa adulto y lo ofrece e concepto conoci como un vakantie exclusivo “Unlimited-Luxury®”, cu ta cubritur e opcionnan di cuminda y servicionan den e hotel, cu ta inclui oferta di cuminda estilo “gourmet a la cart” sin reservacion, servicio di cambernan y roomservice 24 ora pa dia, bebida sin limite, mini bar den camber, actividadnan y entretenimiento nocturno “live”. Y tur e servicio y actividadnan aki ta inclui, pues no mester ni sali cu tas of cartera!
E grupo Apple Leisure Group® (ALG) ta un di e companianan principal di tours, biahe y hospitalidad di Merca. Via su compania AMResorts® nan a desaroya of ta desaroyando proyectonan hotelero grandi den Caribe.
Siendo un compania reconoci como un lider den e mercado di hotelnan “All Inclusive”, awendia AMResorts® ta maneha 66 hotel di e marca aki cu como 9000 camber den pleno desaroyo. E compania ta posee como 24000 camber bou varios marca di hotel na Mexico, den Caribe, Merca y Spaña.
