“Un rato pasa nos a aproba e payroll di mas grandi di SVb. Pa e luna di december, SVb ta paga 21.624 pensioen di behes y 1.540 pensioen di viuda y huerfano. Total, SVb lo paga 21,04 miyon florin na pensioen”, asina ir. Edwin Jacobs a informa ayera tardi riba su pagina di Facebook. E director di nos Banco di Seguro Social (SVb) ta encarga cu pago di pensioen di behes y di huerfanonan.
“Na mes momento SVb ta bay paga 15,3 miyon florin na bonus di fin di aña. Ademas e fondonan di pensioen ta paga 1,9 miyon florin na prima di AZV pa su pensionadonan biba na Aruba”, di acuerdo cu Edwin Jacobs. Pero comosifuera poco, na mes momento el a anuncia cu SVb lo paga adelanta e reparatietoeslag di 2,6 miyon florin. Pues, na tur SVb ta paga dia 1 di december e bunita suma di 41 miyon florin.
“Na inicio di e pandemia e perspectivanan tabata sumamente negativo. A premira cu na inicio di 2021 ya e fondonan lo a agota. Si no tabata pa e sosten di likides cu a financia e areglo di subsidio di salario, awe nos no por a comparti e noticia positivo aki. Ta momento pa nos ta consciente cu nos tur mester pone schoudernan hunto pa carga nos Aruba y sac’e padilanti. Aruba ta bendiciona”, tabata palabranan di ir. Edwin Jacobs di SVb.
