Test poder di motor prome cu por bolbe lanta vuelo

Automobilistanan pasando riba L.G. Smith Boulevard na altura di Camacuri, banda di e cura di aeropuerto, a nota con tabata lastrando un avion di Air Canada riba pista. E avion a bay completamente abou, comosifuera e ta bay lanta vuelo pero e no a lanta. Asina mes a nota cu el a cende su motornan na ful capacidad, pero toch no a bula. Aeropuerto a confirma cu e ta haciendo un “Engine Run Up Test” riba pista.

Tabata diadomingo ultimo cu e vuelo di Air Canada mester a cancela pa motibo cu e capitan a nota un fayo den motor di e avion. A purba drech’e pero no a logra, pa cual e compania mester a paga transporte, hotel y cuminda pa tur pasahero, cu a keda pega na Aruba. Dialuna a saca e vuelo cu un otro avion, pa toch hiba e pasaheronan cas bek, sin problema. E avion sinembargo a keda atras.

A bin un tecnico special di Canada pa brinda asistencia na e tecniconan local pa purba yuda drecha e fayo. Ta sospecha cu tin un problema den e motor. A trece algun piesa adicional pa por a drecha e motor. Pero, prome cu lanta vuelo mester test si acaso e motor por wanta e vuelo di casi 5 ora largo pa Toronto, Canada.

E unico forma pa test esaki, ta via di un “Engine Run Up Test”, cu na otro aeropuertonan por haci na un “blast fence” cu Aruba lamentablemente no tin ainda. Como tal, mester haci uzo di e pista mes pa e avion por blaas su motur na ful capacidad pa tanto minuut pa asina midi su comportacion. Ta depende resultado di e test aki, cu Departamento di Aviacion Civil di Aruba lo duna aprobacion pa e avion por lanta vuelo atrobe pa Canada. Te cu awor ey no ta conoci con e prueba a bay, ni si a “clear” e avion pa realisa e vuelo.