Diasabra anochi a tuma luga Lighting Parade unda cu mas di dos mil persona a participa na esaki. Na banda por a mira e cantidad di persona cu a presenta pa asina mira e parada despues di dos aña.
Lito Lacle, vocero di polis, a indica cu e parada tabata anda na tempo y tabata calcula cu e prome grupo mester a yega ex-DOW pa 12:00 am. El a indica cu durante Jouvert Morning tabatin diesnuebe detencion compara cu 2020, ultimo aña cu a organisa carnaval. E aña ey a detene binti persona. Mainta, durante e control di unidad motorisa, a detene 24 persona, compara cu 2020 esaki a baha cu un. Den e control aki a detene shete hende muhe.
Darren van Ommeren, presidente di SMAC, a splica cu e parada a sali na ora. Un total di seis grupo a participa, ocho banda, tambe a conta cu participacion di dos grupo di brass band, un steelband. Segun van Ommeren, e no a conta cuanto hende a participa, pero a calcula rond di tres mil.
Jair ‘Casper’ Dijkhoff, Soca King, a expresa cu e ambiente dje parada tabata uno dushi hunto cu N’Fuzion. Pa loke ta su cantica, e ta haya cu esaki tabata resona limpi y cu peso. Tanto e participantenan como publico tabata pasa bon. Pa loke ta Roadjam, e ta spera di por gana esaki.
Lissette Chung, lider di grupo T.O.B., a indica cu e grupo tabatin un ambiente formal. Cantidad di participacion tabata un tiki menos, pero e siguiente paradanan nan ta mas grandi. Durante Lighting Parade nan tabatin dies seccion y incluso cincuenta turista a participa cu nan.
Pa mas lesa TREMPAN.COM.
