Minister di Enseñansa, Rudy Lampe, ta preparando pa biaha pa Bolivia pa bay keiro y no a reacciona riba un serie di pregunta cu fraccion di AVP pa medio di Marlon Sneek a dirigi na su persona, relaciona cu preocupacionnan cu tin relaciona cu desaroyonan en cuanto Middag y Avond MAVO y tambe riba e Multi Disciplinaire Centrum.
“Banda di a haci un peticion pa un reunion publico nos a dirigi tambe un serie di pregunta na e minister, Presidente di Parlamento no a yama e reunion publico ainda, pa e hecho cu parlamento ta den un periodo di receso, pero nos a spera di haya reaccion riba preguntanan cu nos a haci pero e minister no a haci esaki.
Nos por a tuma nota si cu despues cu nos a insisti hopi riba e tema y caminda nos a haya diferente reaccion di mayornan cu nan no por inscribi na yiunan pa motibo cu no tabatin placa pa paga e schoolgeld, ya cu e proceso ta cu mester paga e schoolgeld pa por inscribi, minister a duna aprobacion pa laga e muchanan schrijf in y nan tin cu paga prome cu september e suma concerni.
Sinembargo nos a haya yamada dialuna ultimo cu muchanan lo a haya yamada cu pa San Nicolas, klas 1, 2 y 3 lo no bay existi mas y cu nan lo mester bin Avond MAVO pabou.
Pa nos esaki ta nifica cu ta limita gobierno ta bay limita e oportunidad pa nos hobennan pa asina tin e oportunidad pa sigui studia.
Banda di esaki mas aun, nos tur sa cu Middag MAVO a cuminsa pasobra nos tabatin diferente hoben na edad di 16 aña y hasta bou di 16 aña y dor di esaki nan no por a participa na e Avond Mavo.
Aworaki minister a dicidi cu Middag MAVO ta wordo elimina cu ta informacion cu nos tin y tur mucha lo mester bay Avond MAVO y pa nos esaki ta cambionan radical y ta algo di lamenta ya cu tin un cantidad di mucha- y maestronan, hendenan cu awor aki mester ta den un vakantie, preparando pa start bek un aña escolar nobo y ta haya nan mes confronta cu den vakantie, e tipo di cosnan aki ta wordo haci.
Tras di lomba di tur hende y manera cu mi a bisa, e proceso ta caminda e minister di enseñansa no ta bay come e pisca completo pero ta bay come e pisca na mochi y esey ta un cos di lamenta ya cu e minister ta un gobernante responsabel, kisas nos no ta comparti su vision y pensamento ki direccion e kier hiba den e caso aki DPS den su totalidad, pero si nos ta spera transparencia.
Pasobra esey ta e punto number uno cu gobierno aki a priminti, cu nan lo ta un gobierno transparente y cu nan lo bay practica bon gobernacion.
Nos por corda cu e minister aki tabata den yen di comision di bon gobernacion, di cosnan cu no ta cana corecto, pero tambe ta mesun minister aki a bisa den parlamento cu t’asina e ta traha, paso e no tin tempo pa bay bisa hende kico e kier bay haci pa despues e haya hende cu ta bay bringa contra y ta bay tarda su trabou y e no ta bay logra su meta.
Anto di un forma scondi y clandestino, e minister aki ta haci su movecionnan.
Pasobra muchanan a wordo yama pa cuminsa prepara nan mes pa bay schrijf in pabou, kiermen e muchanan tin cu cuminsa pa bay busca den e caso aki bus of un manera pa transporta nan pa scol, cual ta bay hisa e peso financiero un biaha mas pa nan famia, haciendo esaki extra dificil pa e muchanan aki por logra, caminda juist a crea e espacio aki pariba pasobra nos a bisa cu mester hiba educion na e muchanan.
Hopi di e muchanan aki ta muchanan cu pa un of otro motibo no a logra di caba un scol den dia y nan a bira drop out y a crea e espacio aki pa tog nan tin un diploma den nan man na final di dia, pero awor cu e actonan aki di e minister y gobierno, ta bolbe bay obstaculisa e mesun grupo di mucha aki, caminda nos sa cu facilmente nan por cay afo, algun di nan cu yiu y awor no tin cu bay bin te 9’or of 10’or pa despues core bin ariba bek.
Pues ta bay crea full un problema pa e grupo aki y atrobe nos apelacion ta bay akinan pa e reunion publico bin pa caba pa nos por haya aclaracion ya cu den un entrevista e minister di enseñansa e bira tras di tur cos, bisando cu tur cos ta keda mesun cos y ta gewoon un fundacion nobo y ta bou di e fundacion aki tur ta bay, niun hende lo perde algo y awor ya caba nos ta scucha cu tin cortamento.
Ya nos ta scucha cu klas un, dos y tres San Nicolas no ta bay existi mas y ta pabou nan tin cu sigui esaki y nos ta tende cu Middag MAVO ta wordo elimina, pues esaki ta mustra cu e minister no ta sincero, cu e ta gaña.
Aki nos por mira un gobierno cu ta bisa tur ora cu e ser humano ta central pero awor e ser humano ta wordo buta un banda, caminda ta spaar e minister kier spaar pero ningun hende sa kico e kier bay haci cu e placa ey,” lider di fraccion di AVP, Marlon Sneek a declara.
