Recientemente Topcar N.V. a ricibi agradabel sorpresa for di Nacional Nissan –división hubenil. Cu hopi alegría y entusiasmo e muchanan di U17 y U20, cada un Campeon di nan división, a yega Topcar pa asina haci entrega simbolico di nan Trofeonan di Campeon.
Topcar ta orguyoso di a wak un desaroyo positivo den e Club y ta contento di por confirma cu apoyo y sostén continuo na deporte ta duna fruto. Pa añanan largo Topcar ta fiel patrocinador di Nacional división hubenil y tambe a sa di sostene diferente deporte na Aruba.
Eddy Stenebome, General manager di Topcar ta comenta, “Nos tin admiración grandi pa nos teamnan hoben di Nacional. Den transcurso di añanan nos a wak nan bini hunto cu hopi dedicación, positivismo, unión y un ‘can do attitude’ cu awe ta refleha den a logra hiba cas dos? titulo di campeón! Esaki ta un logro hopi grandi nos ta hopi orguyoso di esaki.”
“Nos a yega na campeon door di union, respet y bon comprendimento entre e mucha nan y mi persona. Semper mi ta bisa nan cu prome di ta un team nos ta un famia, cu cualkier hende cu hasi un fout nos ta corregi otro y motiva otro pa haciele miho. Ora nos subi riba veld nos ta sali cu mente positivo y semper cu gana di gana” esaki ta palabranan di Teofilio Albus, Coach di team U-17 di Nacional Nissan.
Topcar asina tambe kier a gradici henter e Team Nacional Nissan pa e bunita gesto y ta desea nan un bon merecido vakantie y descanso pa asina por truinfa den e temporada 2018-2019.
