Na Sint Maarten ta tumando luga e tripartiet unda cu e parlamentarionan di Aruba tambe ta presente. Un biaha mas ta trata diferente topico relaciona cu Reino Hulandes.
Un di e temanan cu hopi bes a scucha den tripartiet como IPKO ta geschillenregeling. Pero tambe e falta di conexion entre e islanan. Esakinan ta tipo di topico cu ta resona hopi mas den fraccion MAS. Marisol Tromp, parlamentario (MAS), a splica riba e presentacion cu nan a ricibi y un ehempel tabata e conexion di vuelo entre e islanan di region y e parti di Reino Hulandes.
Un di e aspectonan cu Tromp a trece dilanti tabata riba e keho di prijs ta halto pa biaha entre e islanan. Esey ta pone cu hende ta prefera di bay bishita otro luga en bes di bishita entre e islanan y ta laga esey pa ora tin entiero, algo significante. A trece e punto ey dilanti pasobra no tin otro forma, ya cu cantidad di vuelo ta tiki, frecuencia no ta mucho halto, etc.
Punto di e parlamentario ta cu hustamente door di baha e prijsnan aki, e frecuencia por subi door di esunnan cu tin famia den e islanan aki. E frecuencia por aumenta si e prijsnan ta mas abou y hende ta scoge pa bay eynan.
E parlamentarionan a ricibi un presentacion amplio riba e tema aki, mas tanto den cuadro di sostenibilidad. Y tambe riba e parti di mirada pa futuro, kico ta e plannan di conexion entre e islanan. Mas cu claro e ta keda c’un aspecto comercial.
Un otro tema cu e parlamentarionan a bay basta diep aden, segun Tromp, tabata riba e geschillenregeling. Esey ta significa cu ora tin situacion di conflicto huridico den Reino Hulandes entre por ehempel e islanan cu Hulanda. Pa hopi tempo e topico aki ta riba agenda. Un biaha mas a pone e topico aki riba agenda.
E biaha aki a pone den un luz con pa anda cu e parti di ley di supervision financiero, esta e parti RAft. Nan a discuti riba tur esunnan cu ta pro y contra un ley di supervision den Reino. Tromp a trece padilanti cu si aworaki mes tin hende ta contra RAft, e ley di supervision di Reino como condicion di Hulanda, “e bachi preta aki por hasta bira mas preta.” Si despues di e eleccion di Hulanda, bin un constelacion den gobierno, manera ta mustra segun e sondeonan, di cual e direccion cu pueblo bay vota ta uno mas rigido cu e islanan akibanda den Caribe.
Pa mas lesa TREMPAN.COM
