Dialuna anochi Minister di Salud Publico Dangui Oduber a asisti n’e lansamento di e E-learning platform pa cuido. Durante e anochi aki HAVA conhuntamente cu Prelum den cooperacion cu AZV y Ministerio di Salud Publico a lansa e plataforma di e-learning. E meta di e plataforma aki ta pa ofrece diferente “modules” den cual experticio y conocemento lo ta ofreci n’e profesionalnan di cuido (beroepsbeoefenaren) na un manera digital.
E prome grupo di dunadonan di cuido cu lo cuminsa haci uzo di e Plataforma aki t’e dunadonan di cuido di prome liña na Aruba (e dokternan di cas). Den futuro lo expande p’e otro grupo di profesional di cuido.
Minister Oduber ta continua cu e desaroyo y colaboracion cu partner p’asina introduci “module” di cuido pa nos dokternan di cas ta yuda e dokternan di cas y den futuro otro profesional den cuido pa mantene nan conocemento “up to date” y alabes cumpli cu e rekisitonan di instituto di calidad y asina mantene nan n’e registracion den AruBIG. Y asina sigui ofrece un cuido di calidad na nos hendenan.
Ministerio ta mantene su vision pa reforsa cuido di prome liña na Aruba conforme e “zorgakkoord”. Ofreciendo accesibilidad na e plataforma digital aki ta crucial pa mantene e educacion di salubridad alcansabel, efectivo, accesibel y pagabel na Aruba.
Minister Dangui Oduber ta gradici tur e partnernan cu a haci e proyecto aki posibel: AZV, HAVA y Instituto di Calidad pa nan esfuerso y dedicacion na e proyecto di Prelum.
Hunto ta dal un paso importante den direccion pa un miho cuido di salud pa nos hendenan na Aruba.
