Un delegacion di Parlamento di Aruba a biaha pa Sint Maarten pa reuni cu nan coleganan di Parlamento di Corsou y Sint Maarten. E reunion aki no tabata uno oficial di preparacion di IPKO (cu ta esun di tur Parlamento di Reino Hulandes). Esaki tabata un encuentro riba iniciativa di e islanan CAS (Curacao, Aruba y Sint Maarten) pa prepara nan mes prome cu e otro encuentro oficial.
Tabata un encuentro di un dia di reunion, diamars mainta, pasobra den oranan di anochi a finalisa cu esaki.
A trata rond di dies tema di importancia pa e islanan CAS y dos tema cu a resalta basta den e encuentro aki tabata e Geschillenregeling y e conexion (transporte) entre e dos islanan. Den transcurso di tempo, segun e parlamentario a comenta, a realisa cu mester tin reunionnan unda ta atende no solamente temanan cu ta bay discuti den IPKO pero tambe temanan cu ta trece mas union entre e islanan.
A base di e pensamento ariba menciona e nace e tipo di tripartiet aki fisicamente y algun biaha den forma virtual. Y e tema di geschillenregeling ta riba e agenda. E tema aki ta hustamente loke a lanta e necesidad entre e islanan pa tin mas union, pa bay como un solo forsa lucha pa algo.
A bay hunto cu un proposicion y a yega na un punto cu Hulanda casi a acepta esaki, pero na caminda a bini algun cambio. Loke e por bisa ta cu e puntonan di discusion di e ultimo dos aña ta e esunnan cu ta na discusion.
Mesun importante ta e topico di conexion entre e islanan. E ta mira algun desaroyo positivo, pero no por nenga tampoco cu bula entre e islanan ta hopi caro. Informacion di estudionan haci recientemente ta mustra cu tin e gastonan di landing fee cu ta halto, e tipo di fleta di avion cu nan ta uza, etc.
Den e reunion di diamars a papia di avionnan cu lo ta mas sostenibel, e navenan cu probablemente lo bay pa pasado y kico tur por haci. A haci un presentacion na gobierno di cada isla y e ta un tema cu lo sigui discuti riba dje den e proximo lunanan, pa mira con por yega na reduci e gastonan di landing fee.
A papia riba e acuerdo di fiansa cu Hulanda y por a conclui, segun Croes, cu cada isla tabatin un experencia diferente, cu un otro tipo di interes. Apesar di esey, e ta kere cu union riba e tema aki lo por yuda pa cada un ta miho para ora di decisionnan cu mester tuma.
El a tuma nota cu Aruba ta trata di busca apoyo riba nivel di Reino pa e situacion aki. Pero e ta kere cu na cas mester ta riba un linea cu otro.
