Hopi cos a bin dilanti cu Minister di Economia, mr. Geoffrey Wever, lo bandona RAIZ. A lig’e cu otro partido existente. Pero, e mandatario mes a confirma cu e ta solido cu RAIZ y lo ta riba lista di e partido.
E mandatario tabata na Washington DC, Merca, pa cuater dia, unda el a tene diferente reunion. Na su regreso for di Washington, Merca, Geoffrey Wever, Minister di Economia, a enfatisa cu e ta solido cu RAIZ. P’e eleccion cu lo tuma luga otro aña, e ta bolbe bay cu RAIZ.
Algun luna atras tabata liga e mandatario na MEP, bisando cu e lo bandona RAIZ. Un partido cu si ta desea di haya Wever riba su lista ta ACCION21, segun e lider Miguel Mansur a expresa. Aunke a bin diferente speculacion, Geoffrey Wever ta keda cu su partido actual.
Tocante Geoffrey Wever
mr. Geoffrey Wever a caba VWO na Colegio Arubano y despues a studia na VU Amsterdam, prome como notario y despues como fiscalista, pues den leynan di belasting. Su experiencia laboral a start como fiscalista na Sprigthoff na Hulanda. Ora el a yega Aruba el a traha como abogado na bufete Croes, Wever & Tchong te na aña 2014.
Despues el a cuminsa duna les na Universidad di Aruba den e facultad financiero-economico, riba derechonan comercial. Tambe den e facultad di ley y proceduranan civil. E tabata partner den e bufete di abogado De Cuba Wever Attorneys at Law. E aña aki el a uni na e partido politico RAIZ y den su prome salida a logra no menos di 1430 voto individual.
