Lider di fraccion di MAS, drs. Marisol Lopez-Tromp a haci varios pregunta na e ministernan presente durante di e prome tanda di e reunion publico cu a tuma luga den parlamento diahuebs.
E ta comenta cu den e caso aki e parlamentarionan di coalicion ta esunnan cu a yama e reunion, enbes di a haci pregunta, ta oposicion a haci mayoria di e preguntanan. Mas bien nan tabata defende gobierno, segun Lopez-Tromp.
E parlamentario a haci pregunta loke pueblo kier sa. A puntra riba e reparticion di cartera, kico ta cay precies bao di cada minister. A bay cu preocupacion cu tin riba cada minister den comunidad. Pasobra ta papiando aki di proceso di screening. E documentonan nunca a bin parlamento pasobra ta algo cu ta tuma luga entre formado y gobernador, etc. Pero si ta pidi parlamento pa aproba e nombracionnan.
UN TANDA TERIBEL
Pa loke ta e nivel di parlamento den e ultimo tanda tabata uno teribel, segun Lopez-Tromp, den e sentido di parlamento lo mester sa di guia e reunion di tal forma cu e ministernan no por ta bin den sala y enbes di duna splicacion riba e preguntanan haci, ta hiba un reunion politico, atacando parlamentario y hasta bisa parlamentario cu tin cu bay sinta riba nan stoel y mas cos grosero, incluso di prome minister.
Mientras cu MAS den e caso aki a haya carta apenas algun siman pasa, pa aproba e nombracion di e mesun ministernan aki. A trece dilanti kico t’e preocupacionnan di comunidad pa loke ta e carteranan di cada minister.
Lopez-Tromp a indica cu e preguntanan cu e tabatin ta basa riba entre otro kico tur por ta conflicto di interes, entre cierto minister y su cartera.
Pa loke ta e reunion di awe tardi, algun minister a bin cu discurso, enbes di contesta preocupacion y pregunta concreto. Lopez-Tromp no a haya contesta riba tur pregunta y a keda ainda cu cierto incertidumbre pa funcion di cierto minister. A haci pregunta por ehempel na Endy Croes, mirando e discusion cu si e tin conflicto di interes den un caso cu aparentemente tin pendiente ainda, cu tin di haber cu Lotto y den e caso aki c’un compania y si e ta dispuesto pa lag’e caso cay.
Por lo general, un reunion caminda cu e ministernan a haya ta bon pa lastra algun parlamentario y nan famia, sin contesta pregunta y c’un presidente di parlamento cu ta permiti esaki.
Pa cobertura mas amplio lesa edicion di TREMPAN mañan.
