Pa loke ta trata e reunion parlamentario cu a tuma luga diahuebs tocante e presupuesto di DOW, drs. Marisol Lopez-Tromp, lider di fraccion di MAS, a bisa cu nan fraccion a opta pa enfoca riba un tema specifico, esta cu minister president a bisa luna pasa cu el a lanta un comision special pa drecha, cambia of elimina e problema di e UTV/ATV of cualkier otro vehiculo cu ta causa daño na naturalesa den forma structural, y cu den un manera of otro, ta promovi den turismo.
Lopez-Tromp a splica cu el a trece esaki dilanti debi cu ya ta casi un aña y mei pasa cu parke Arikok a gana un caso den cual a dicta cu e tipo di vehiculonan aki no por pasa den e parke mas pero mester busca ruta alternativo. Sinembargo, esaki a causa hopi conmocion y a hasta lanta algun comision contra esaki debi cu ta “nan pan di cada dia”.
No obstante, Lopez-Tromp a enfatisa cu te cu awe ainda tin situacion peligroso relaciona cu e vehiculonan aki, por ehempel accidente grave, pero ainda no a haci nada riba esaki y te ainda e vehiculonan aki ta riba caminda y ta maneha pa persona di afo cu no sa con pa controla esakinan. “Aruba ta e unico pais na mundo cu ta permiti nan core riba caya publico memey di trafico…cu hendenan cu no ta maneha e vehiculonan aki tur dia”. Riba esaki, Lopez-Tromp a haci un cantidad di pregunta pa por haya clarificacion riba e situacion y ningun di nan a ricibi contesta for di minister president.
Pa cobertura mas amplio lesa edicion di TREMPAN mañan.
