Dialuna tabatin Clausura di Aña Parlamentario y na mes momento ta na bispo di un Aña Parlamentario Nobo, pa 2022-2023.
Durante e reunion aki a repasa tur e reunionnan den parlamento pa Aña Parlamentario 2021-2022. Den su discurso, drs. Marisol Lopez-Tromp, a pone enfasis riba e reunionnan publico pidi y cu e Presidente di Parlamento no a yama nan. Loke ta pasa varios biaha ta cu e Presidente di Parlamento en bes di yama un reunion publico, ta yama un ‘bijeenkomst.’
Tambe ta na bispo di un Aña Parlamentario nobo, cual ta cuminsa desde diamars. Lo tin un discurso di S.E. Gobernador di Aruba, Alfonso Boekhoudt. Asina tambe e ta duna e vision, e maneho pa e tempo nos dilanti. Un di e aspectonan cardinal ta e situacion financiero actual, e parti cu Hulanda, incumplimento cu e afspraaknan traha cu Hulanda.
Siman pasa, e tres partidonan di oposicion a bini hunto y a urgi pa retira e presupuesto, pero Prome Minister, mr. Evelyn Wever-Croes a indica cu e no ta bay haci esaki. Pa Lopez-Tromp, e presupuesto 2023 ta uno ficticio y oposicion ta pidi pa entrega uno realistico, cu ta pasa door di conseho di Raad van Advies y CAft. “Ta hustamente door di incumplimento, nos ta unda cu nos ta aworaki”, Lopez-Tromp a bisa.
E presupuesto actual no ta refleha realidad. Un ehempel ta cu gobierno a dicidi cu no ta continua cu BTW, pero ta sigui cu BBO. Pero den e begroting e ta otro poni. A base di e propuesta cu tin riba mesa, pa loke ta e aanwijzing, manera cu Secretario di Estado, Alexandra van Huffelen, e ta un proposicon di CAft pa incumplimento di gobierno. Di e 13 puntonan cu a pone, Gobierno ta cumpli cu solamente un di nan. Pa CAft, mester cambia presupuesto 2022.
Pa loke ta Presidente di Parlamento, mr. Edgard Vrolijk, tin su opinion, pero den su rol como presidente, e no por vocifera su propio opinion. Segun Reglament van Orde, e presidente ta opina y vocifera loke Parlamento ta trece padilanti.
Pa e siguiente Aña Parlamentario, drs. Marisol Lopez -Tromp lo kier pa eleva e nivel y contenido den Parlamento. Hopi biaha ta wak minister-president y minister di finansa ta ataca, purba di bagatelisa diferente parlamentario den oposicion.
Tambe e lo desea pa no solamente eleva e nivel di parlamento, pero pa cada parlamentario y minister cu ta bin parlamento, pa contesta pregunta y keda den contenido di e materia. No desvia di e materia manera cu ta sosode actualmente.
